जळगाव (प्रतिनिधी) – शहरातील मुख्य भागात असलेल्या डॉ. बेंडाळे महिला महाविद्यालयासमोरून दुचाकीने घरी जात असलेल्या तरूणीला एकाने अश्लिल हातवारे करून छेड काढली. यावेळी संबंधित तरूणाला पकडून नागरीकांनी चोप दिला. त्याला जिल्हापेठ पोलीसांच्या स्वाधिन केले आहे. हा प्रकार गुरुवार दि. १९ रोजी सायंकाळी ४ वाजेच्या सुमारास घडला.
शहरातील एका वीस वर्षीय तरूणी दुचाकीने आज सायंकाळी ४ वाजेच्या सुमारास बेंडाळे महाविद्यालयाकडून घरी जात होती. भारत नानकराम रामचंदाणी (वय-२१) रा. सिंधी कॉलनी, जळगाव हा तरूणीकडे पाहून दुचाकीचा हार्न वाजवित होता. हार्न का वाजविला असा जाब तरुणीने विचारला असता त्याने अश्लिल भाषा वापरून हातवारे केले. तरूणीने आरडाओरड करताच नागरीकांनी त्याला पकडून चांगलीच बेदम मारहाण केली. यावेळी निर्भया पथकाच्या महिला कर्मचाऱ्यांनी त्याला ताब्यात घेत जिल्हा पेठ पोलीसांच्या ताब्यात देण्यात आले. दरम्यान तरूणीच्या तक्रारीवरून जिल्हा पेठ पोलीस ठाण्यात भारत रामचंदाणी यांच्या विरोधात गुन्हा नोंदविण्याचे काम सुरू होते.
