जळगाव ( प्रतिनिधी ) – जळगाव ते आसोदा दरम्यान शाळेतून सुटल्यानंतर बसमधून प्रवास करत घरी जात असलेल्या विद्यार्थींनींची छेड काढल्याचा प्रकार घडला आहे. विद्यार्थींनींची छेडखानी केल्याप्रकरणी असोदा येथील गावकऱ्यांकडून पब्लिक मार देण्यात आला. ही घटना गुरूवारी १७ नोव्हेंबर रोजी रात्री ८ वाजता असोदा गावात घडली. याप्रकरणी दोघांना जिल्हापेठ पोलीसांच्या ताब्यात देण्यात आले असून दोघांवर गुन्हा दाखल करण्यात आला आहे.
याबाबत सविस्तर वृत्त असे की, जळगाव तालुक्यातील असोदा येथील आठवी ते दहावी शिकणाऱ्या विद्यार्थीनी ह्या बसने प्रवास करून जळगाव शहरात येतात. तर सायंकाळी पुन्हा बसने घरी जातात. मात्र, गेल्या महिन्याभरापासून दीपक पुंडलिक सपकाळे आणि मोहित बुधा सोनवणे हे दोन टवाळखोर विद्यार्थिनींच्या मागे लागून अश्लील शेरोशायरी करत होते. परंतू याकडे विद्यार्थींनी दुर्लक्ष केले. दरम्यान, गुरूवार १७ नोव्हेंबर रोजी सायंकाळी आसोदा गावातील सर्व विद्यार्थींनी जळगाव नवीन बसस्थानकात येवून बसमध्ये बसल्या. त्यावेळी हे दोन्ही टवाळखोर देखील बसले. जळगाव आसोदा रस्त्यादरम्यान बसमध्ये विद्यार्थींनी प्रवास करत असतांना पुन्हा विद्यार्थींनीसोबत अश्लिल भाषेत शेरोशायरी करत छेडखाणी करण्यास सुरूवात केली. तुझे नाव काय, नंबर काय असे बोलून काही विद्यार्थींसोबत अश्लिल वर्तन केले. सायंकाळी घरी गेल्या यातील काही विद्यार्थींनींनी हा प्रकार नातेवाईकांना सांगितला. हा प्रकार काही नागरिकांना कळाल्यानंतर त्यांनी दीपक, मोहित यांना शोधून चांगलाच चोप दिला. नंतर पोलिसांच्या ताब्यात दिले. याप्रकरणी दोघांवर जिल्हापेठ पोलीस स्टेशनला गुन्हा दाखल करण्यात आला आहे. पुढील तपास सपोनि बी. पवार करीत आहे.
