मुंबई (प्रतिनिधी) – पुढील वर्षी होणाऱ्या लोकसभा आणि विधानसभा निवडणुकांच्या पार्श्वभूमीवर महाराष्ट्रात सर्वच राजकीय पक्षांच्या गोटात हालचालींना वेग आला आहे. राष्ट्रवादी काँग्रेसचे अध्यक्ष शरद पवार यांच्या अध्यक्षतेखाली आज १७ रोजी मुंबईतील यशवंतराव चव्हाण सेंटर येथे सर्व प्रमुख नेत्यांच्या उपस्थितीत पक्षाच्या कोअर कमिटीची बैठक झाली. राज्यातील व देशातील घडामोडींच्या पार्श्वभूमीवर शरद पवार यांनी पक्षाच्या सद्यस्थितीचा यावेळी आढावा घेतला. तसंच पक्षसंघटना मजबूत करण्याच्या दृष्टीने बूथ कमिटी बांधणीचा कार्यक्रम हाती घेण्यात आला असून यासाठी १८ नेत्यांवर महत्त्वाची जबाबदारी सोपवण्यात आली आहे.
एकीकडे बूथ कमिटी बांधण्याचा उपक्रम राबवण्यात येत असतानाच महाराष्ट्राची अस्मिता असलेल्या छत्रपती शिवाजी महाराज यांचा राज्याभिषेक सोहळाही मोठ्या प्रमाणात साजरा करण्याचा निर्णय राष्ट्रवादीकडून घेण्यात आला आहे. राज्यभरातील पदाधिकारी शिवराज्याभिषेक सोहळा भव्य-दिव्य पद्धतीने साजरा करतील, असं राष्ट्रवादीचे प्रदेशाध्यक्ष जयंत पाटील यांनी पक्षाध्यक्ष शरद पवार यांच्या उपस्थितीत पार पडलेल्या बैठकीनंतर म्हटलं आहे. तसंच राष्ट्रवादी पक्षाच्या वर्धापनदिनाचा यंदाचा कार्यक्रम अहमदनगरमध्ये होणार असल्याचं पाटील यांनी सांगितले.
लोकसभा आणि विधानसभा निवडणुकीत पक्षाला चांगलं यश मिळवायचं असेल तर बूथ स्तरावर पक्ष मजबूत स्थितीत असला पाहिजे, असा विचार करून शरद पवार यांनी १८ नेत्यांवर याबाबतची जबाबदारी सोपवली आहे. यात खान्देश स्तरावर जळगाव, धुळे, नंदुरबार या जिल्ह्यांमध्ये अमळनेर येथील आ. अनिल भाईदास पाटील बूथप्रमुख म्हणून काम पाहतील, तर सहबूथप्रमुखपदाची जबाबदारी खडसे कुटुंबावर असणार आहे. मराठवाड्यातील जिल्ह्यांसह नाशिक आणि अहमदनगरमध्ये धनंजय मुंडे हे बूथप्रमुखपदाची धुरा सांभाळणार असून आ. विक्रम काळे आणि सतीश चव्हाण यांच्याकडे सहबूथप्रमुखपद असेल.
कोल्हापूर, सातारा, सांगली या जिल्ह्यांमध्ये राष्ट्रवादीचे विधानपरिषद आ. शशिकांत शिंदे यांच्यावर बूथप्रमुखपदासाठी विश्वास दाखवण्यात आला असून अरुण लाड हे सहबूथप्रमुख म्हणून त्यांना साथ देणार आहेत. पुणे शहर आणि जिल्ह्यात मावळचे आ. सुनिल शेळके यांना बूथप्रमुख म्हणून काम पाहण्यास सांगण्यात आलं असून सहबूथप्रमुखपद चेतन तुपे यांच्याकडे असणार आहे. सोलापूर जिल्ह्याची जबाबदारी आ. अशोक पवार आणि चेतन तुपेंकडे देण्यात आली आहे. ठाणे-पालघर या मुख्यमंत्री एकनाथ शिंदे यांचा प्रभाव असणाऱ्या जिल्ह्यांमध्ये राष्ट्रवादीचा झेंडा फडकवण्यासाठी आ. जितेंद्र आव्हाड यांना ताकद देण्यात आली असून सुनिल भुसारा हे सहबूथप्रमुख म्हणून काम पाहतील.
कोकणात अनिकेत तटकरे हे बूथप्रमुख असीतल तर शेखर निकम हे सहबूथप्रमुख म्हणून त्यांना मदत करतील. विदर्भ नागपूर विभागात अनिल देशमुख यांच्यावर विश्वास दाखवत राष्ट्रवादीने त्यांना बूथप्रमुख दिलं असून मनोहर चंद्रिकापुरे हे त्यांचे सहकारी असतील. विदर्भ अमरावती विभागात राजेंद्र शिंगणे यांच्या खांद्यावर बूथप्रमुखपदाची जबाबदारी सोपवण्यात आली असून प्रवक्ते म्हणून पक्षाची बाजू मांडणारे आ. अमोल मिटकरी हे या विभागात सहबूथप्रमुख असणार आहे.
