पाचोरा (प्रतिनिधी) – येथील आमदारांच्या नेतृत्वाखालील पाचोरा नगरपालिकेच्या भोंगळ कारभाराने त्रस्त झालेल्या जनतेच्या व्यथा प्रदर्शित करणारी अनोखी पोस्टरबाजी करून येथील भारतीय जनता पार्टी तर्फे ” होय करून दाखवलं !” या शीर्षकाखाली सत्ताधाऱ्यांना चिमटे काढण्यात आले. या पोस्टरबाजीमुळे सत्ताधारी शिवसेनेच्या विरोधात भारतीय जनता पार्टीने रणशिंग फुंकल्याने पाचोर्यातील राजकारण ढवळून निघाले आहे.
शहरातील नगरपालिकेच्या नियोजनशून्य कारभारामुळे व्यापाऱ्यांसह सर्वसामान्य नागरिकांना अनेक अडचणींना सामोरे जावे लागत आहे. शहरातील प्रमुख रस्त्यांच्या कामामुळे पर्यायी व्यवस्था व कुठलेही नियोजन न केल्याने नागरिकांना कोरोना सारख्या परिस्थितीत तासंतास वाहतूक वर्दळी मध्ये अडकून राहावे लागत आहे. नुकत्याच झालेल्या मुसळधार पावसामुळे शहराची अवस्था बिकट झाली आहे. भुयारीमार्गातून जाणारा अत्यंत रहदारीच्या बोगद्यातून पूर्णपणे पाणी साचून ह्या बोगद्याला एकप्रकारे नदीचे स्वरूप पाहायला मिळाले. अशा परिस्थितीत देखील अडकलेल्या नागरिकांना आपल्या घरी परतण्यासाठी जीवाची पर्वा न करता कमरेपेक्षा जास्त पाण्यात उतरून यातून मार्ग काढावा लागला.
यावेळी भारतीय जनता पक्षाकडून नगरपालिका प्रशासनावर ताशेरे ओढण्यात आले आहेत. संपूर्ण परिस्थितीला न.पा. व तालुक्याचे अकार्यक्षम आमदार जबाबदार असून त्यांनी नागरिकांच्या जीवाशी खेळणे बंद करावे, तसेच बोटिंगचा आनंद लुटण्यासाठी गोवा किंवा कोकणात जाण्याची गरज नाही, असे उपरोधात्मक टीकेचे पोस्टर शहरातील विविध कॉलनी परिसरात लावल्याचे दिसत आहे. त्यासोबतच भारतीय जनता पार्टी पाचोरा तर्फे आमदारांनी जनतेच्या पैशाने शहरात निकृष्ट दर्जाचे काम केल्याचे आरोप केला आहे.
याबाबत नगरपालिकेतील सत्ताधारी शिवसेनेचे नगराध्यक्ष संजय गोहिल यांचा भाजपा तालुकाअध्यक्ष अमोल शिंदे यांच्या नेतृत्वात सत्कार करण्यासाठी गेले होते. नगराध्यक्षांचे दालन बंद असल्याने त्यांच्या दालनाच्या प्रवेशद्वारालाच पुष्पहार व श्रीफळ घालून आभार पत्र चिटकवण्यात आले. याप्रसंगी भाजपा शहराध्यक्ष रमेश वाणी, सरचिटणीस दीपक माने, गोविंद शेलार, संजय पाटील, भाजयुमो शहराध्यक्ष समाधान पाटील, सरचिटणीस भैया ठाकूर,कुमार खेडकर, वीरेंद्र चौधरी, जगदीश पाटील, ज्येष्ठ कार्यकर्ते किशोर संचेती,र मेश शामनानी तसेच पदाधिकारी व कार्यकर्ते उपस्थित होते.
