भडगाव (प्रतिनिधी) – तालुक्यातील कजगाव येथे धक्कादायक घटना घडली आहे. एका दहा वर्षीय बालकाला चक्कर येऊन पडल्याने त्याचा मृत्यू झाला आहे. त्याला उष्माघात झाला असल्याची प्राथमिक शक्यता वर्तविण्यात येत आहे. दरम्यान, गरीब परिवारातील विद्यार्थ्याचे अचानक दुर्दैवी निधन झाल्याने कजगावावर शोककळा पसरली आहे.
विराट गोपीचंद मालचे (वय १०, रा. कजगाव ता. भडगाव) असे मयत विद्यार्थ्यांचे नाव आहे. तो कजगावातील जिल्हा परिषदेच्या शाळेत इयत्ता दुसरीत शिकत होता. आता परीक्षा उत्तीर्ण होऊन तो इयत्ता तिसरीत गेला होता. शाळेत तो अत्यंत हुशार विद्यार्थी होता. मंगळवारी दुपारी १. ३० वाजेच्या सुमारास सध्या सुट्ट्या लागल्याने तो गावात मित्रांसह खेळत होता. अचानक त्याची तब्येत खराब झाली. त्याला अत्यवस्थ वाटू लागल्याने कुटुंबीयांनी ग्रामस्थांच्या मदतीने त्याला चाळीसगाव ग्रामीण रुग्णालय व नंतर धुळे येथील रुग्णालयात उपचारासाठी नेले होते. मात्र रस्त्यातच त्याचा मृत्यू झाला.
त्याच्या निधनाची वार्ता कळताच कजगाव शोकाकुल झाले. त्याच्या पश्चात आई, वडील, भाऊ, बहीण असा परिवार आहे. वडील इतरांच्या शेतात मजुरी करून उदरनिर्वाह करतात. कष्टाळू गरीब घरातील अभ्यासू विद्यार्थ्यांचे आकस्मिक निधन झाल्यामुळे सर्वत्र हळहळ व्यक्त करण्यात येत आहे. दरम्यान, मे महिना सुरु असून दिवसा उन्हात कोणी फिरू नये असे आवाहन वैद्यकीय अधिकाऱ्यांनी केले आहे.
