धरणगाव ( प्रतिनिधी ) – एकीकडे मंत्रीमंडळाचा विस्ताराची उत्सुकता असतांनाच माजी मंत्री आ. गुलाबराव पाटील यांच्या समर्थकांनी आज राजीनामासत्र सुरू केले आहे.
जिल्ह्याचे पालमंत्री आ. गुलाबराव पाटील यांनी शिंदे गटाची साथ घेतली असून त्यांचा पहिल्याच टप्यात मंत्रीमंडळात समावेश होणार असल्याचे संकेत मिळाले आहेत. आमदार पाटील हे शिंदे गटात दाखल झाल्यानंतर धरणगावात शिवसेनेचा मेळावा देखील घेण्यात आला होता. तेव्हाच गुलाबभाऊ समर्थकांनी याकडे पाठ फिरवली होती. मध्यंतरी मतदारसंघातील सर्व महत्वाच्या पदाधिकार्यांनी आ. गुलाबराव पाटील यांची भेट घेऊन त्यांची सोबत कायम राखणार असल्याची ग्वाही दिली होती.
या अनुषंगाने आज शिवसेनेचे उपजिल्हा प्रमुख तथा धरणगावचे माजी नगराध्यक्ष पी. एम. पाटील आणि शहराध्यक्ष राजेंद्र महाजन यांनी पदांचे राजीनामे शिवसेनाच जिल्हाप्रमुख विष्णू भंगाळे यांच्याकडे सुपुर्द केले आहेत. आता जळगाव ग्रामीण मतदारसंघातील पदाधिकारी पदांचे राजीनामे देऊन आ. गुलाबराव पाटील यांच्या सोबत जाणार असल्याचे संकेत मिळाले आहेत.
