जळगाव (प्रतिनिधी) – जळगाव शहरातील शिव कॉलनी रेल्वे उड्डाण पुलाजवळ भरधाव डंपरने आज पुन्हा एक बळी घेतला असून दुचाकीला दिलेल्या धडकेत तरूणी ठार झाली असून तिचा भाऊ थोडक्यात वाचला आहे.
याबाबत सविस्तर माहिती अशी की, शिव कॉलनी रेल्वे उड्डाण पुलाजवळ भरधाव डंपरने दुचाकीला जोरदार धडक देताच दुचाकीवर बसलेल्या तरुणी जागीच ठार झाल्याची घटना आज दुपारी चार वाजेच्या सुमारास घडली आहे. जळगावकडून धुळ्याकडे जाणारा डंपर क्रमांक ( एमएच १९ सीवाय ३३११) हा शिव कॉलनी कडून रेल्वे उड्डाणपुराकडे जात होता. त्यावेळेस पुढे जाणारी मोपेड दुचाकी (एमएच १९ सी ७१६९) याला डंपरने मागून जोरदार धडक दिली. यात दुचाकीवर बसलेल्या मनस्वी उर्फ ताऊ सुभाष सोनवणे (वय-२० रा.खोटे नगर, जळगाव) या तरुणीचा जागीच मृत्यू झाला. तर या अपघातात तरुणीचा भाऊ नचिकेत सुभाष सोनवणे (वय २५ रा. खोटे नगर, जळगाव) हा थोडक्यात बचावला आहे.
ही दुर्घटना मंगळवारी १५ नोव्हेंबर रोजी दुपारी ४ वाजेच्या सुमारास घडली आहे. घटनेची माहिती मिळाल्यानंतर शहर वाहतूक शाखेचे पोलीस कर्मचारी, रामानंदनगर पोलीस स्टेशनचे पोलीस कर्मचारी आणि जिल्हापेठ पोलीस स्टेशनचे कर्मचारी यांनी घटनास्थळी जाऊन मृतदेहाचा पंचनामा केला. दरम्यान रामानंदनगर पोलिसांनी राखेने भरलेला डंपर ताब्यात घेतला असून गुन्हा दाखल करण्याचे काम सुरू होते.
