पाचोरा ( प्रतिनिधी) – सत्ताधुंद आमदाराला झोपेतून जाग यावी म्हणून भाजपा व किसान मोर्चा तर्फे पाचोरा शहरात ढोल बजाओ आंदोलन करण्यात आले.
आज सकाळी छत्रपती शिवाजी महाराज चौकात झालेल्या या ढोल बजाओ आंदोलनात पाचोरा -भडगाव तालुक्यातील हजारो शेतकरी उत्स्फूर्तपणे सहभागी झाले होते.
महावितरणाच्या आडमुठ्ठे धोरणामुळे होरपळलेल्या बळीराजासाठी भाजपा पाचोरा व भडगावतर्फे सत्ताधुंद राज्य सरकारसह स्थानिक आमदारांना जागवण्यासाठी आयोजित केलेला हा एल्गार यशस्वी झाला.शेतकरी बांधवांना ऐन रब्बी हंगामात वारंवार भेडसावणाऱ्या विजेच्या समस्यां विरोधात हे लक्षवेधी आंदोलन होते. पाचोरा भडगाव तालुक्यातील त्रस्त शेतकऱ्यांनी भाजपाच्या नेतृत्वाखाली भारतीय जनता पार्टीच्या कार्यालयापासून घोषणा देत शिवाजी महाराज चौकात जाऊन या नाकर्ते सरकारच्या विरोधात ढोल बजाव आंदोलन केले ,
ट्रान्सफार्मर (डी.पी.)वरून होणारी वीज तोडणी त्वरित थांबवावी, कृषिपंपांचा वीजपुरवठा ८ तास नियमित व योग्य दाबाने देण्यात यावा, नादुरुस्त डी.पी. ४८ तासांत दुरुस्त करून देण्यात यावी.
जुलमी पद्धतीने होणारी वीज बिल वसुली तात्काळ थांबावी, यासह अन्य प्रश्नांना वाचा फोडण्यासाठी भाजपाने हे आन्दोलन केले.
मार्च महिन्याच्या उन्हात सुद्धा हजारो शेतकऱ्यांनी हे आंदोलन यशस्वी केले. दोन वर्षांपासून राज्य सरकारने शेतकऱ्यांचा केलेला छळ लक्षात घेता शेतकऱ्यांचा आक्रोशाला भारतीय जनता पार्टीने वाट मोकळी करून दिल्याचे स्पष्ट झाले.
यावेळी छत्रपती शिवाजी महाराज व डॉ.बाबासाहेब आंबेडकर यांच्या पुतळ्याला माल्यार्पण केल्यानंतर मोर्चाला संबोधित करताना पाचोरा भाजपा तालुकाध्यक्ष अमोल शिंदे यांनी आमदार किशोर पाटील यांच्यावर शरसंधान साधत ज्या शेतकऱ्यांच्या जीवावर ते आमदार झालेत त्या शेतकऱ्यांनाच आमदारांनी वाऱ्यावर सोडले असुन आमदारांकडून शेतकऱ्यांच्या समस्या सुटत नसतील तर त्यांनी राजीनामा द्यावा अशी मागणी केली आमदारांना टक्केवारी मिळत असलेल्या विकास कामांमध्ये फक्त रस असून शेतकऱ्यांसह सामान्य जनतेच्या मूलभूत समस्यांवर आमदार दुर्लक्ष करीत आहेत. ते फक्त ठेकेदार मित्रांचे आमदार नसून सामान्य जनतेचे आमदार आहेत हे भान त्यांनी ठेवावे असे अमोल शिंदे यांनी सांगितले.
जिल्हा सरचिटणीस व जि.प.सदस्य मधुकर काटे यांनी देखील आमदारांसह राज्य शासनावर टीका केली. याप्रसंगी भारतीय जनता पार्टी पाचोरा आणि भडगाव तालुक्याचे सर्व लोकप्रतिनिधी , पदाधिकारी, कार्यकर्ते व शेतकरी मोठ्या प्रमाणात उपस्थित होते.
