श्रीनगर (वृत्तसंस्था) – जम्मू-काश्मिरातील शोपियान भागात सुरक्षादलांनी सोमवारी जैश-ए-मोहम्मद संघटनेचा कुख्यात दहशतवादी सज्जाद अफगानी याला कंठस्नान घातले आहे. दरम्यान दहशतवादी आणि सुरक्षा दलांमध्ये शनिवारपासून ही चकमक सुरू होती. यात सज्जाद अफगानी ठार झाल्यामुळे दहशतवादी संघटनांना मोठा हादरा बसल्याचे मानले जातेय.
जम्मू-काश्मिरातील शोपियानच्या रावलपोरा गावामध्ये काही दहशतवादी लपून बसल्याची माहिती पोलिसांना मिळाल्यानंतर जम्मू-काश्मीर पोलीस, लष्कर आणि सीआरपीएफ यांनी संयुक्तपणे या दहशतवाद्यांविरोधात मोहीम उघडली. यावेळी झालेल्या चकमकीमध्ये जैश-ए-मोहम्मदचा जम्मू-काश्मीरमधील कमांडर सज्जाद अफगानी याचा खात्मा करण्यात आला. दहशतवादी सज्जाद जैश-ए-मोहम्मद या संगटनेसाठी नव्या तरूणांना भरती करून त्यांना प्रशिक्षण देण्याच्या यंत्रणेत सहभागी होता. दरम्यान, ही धुमश्चक्री अजूनही सुरू असल्याची माहिती मिळत असून अजूनही दोन दहशतवादी रावलपोरामधल्या एका घरात लपले असल्याची माहिती जम्मू-काश्मीर पोलिसांकडून देण्यात आली आहे. दहशतवाद्यांविरोधातली ही मोहीम शनिवारी संध्याकाळपासूनच सुरू करण्यात आली. जम्मू-काश्मीर पोलिसांना रावलपोरा गावामध्ये दहशतवादी लपून बसल्याची खबर मिळाली होती. पण प्रत्यक्ष कारवाई करण्यासाठी ज्या गावकऱ्यांनी सुरक्षा दलांना माहिती दिली, तेच गावकरी दहशतवाद्यांसोबत गावातल्या घरात अडकल्यामुळे ही कारवाई थांबवण्यात आली. त्या सगळ्यांना बाहेर काढल्यानंतरच सुरक्षा दलांनी कारवाई सुरू केल्याचे पोलिसांनी सांगितले.
