अमळनेर (प्रतिनिधी) :- शहरातील सप्तश्रृगी कॉलनीतील ज्वेलर्स दुकान फोडून सोन्याचे दागिने व रोकड असा २ लाख २१ हजार रुपये किमतीचा मुद्देमाल चोरून नेल्याची घटना उघडकीला आली आहे. यासंदर्भात शनिवारी १३ मे रोजी सायंकाळी ७ वाजता अमळनेर पोलीस ठाण्यात गुन्हा दाखल करण्यात आला आहे.
मनीष प्रकाश सोनार यांचे सप्तशृंगी कॉलनीतील मानसी ज्वेलर्स व कॉस्मेटिक दुकान आहे. दुकानासमोरील शुभम खंबायत याने मनिषला पहाटे साडे तीन वाजता फोन केला की तुमच्या दुकानात सिल्वर रंगाच्या चार चाकी क्रमांक (एम एच ०९ ए क्यू १५५९) मधून चार जण आले. दुकानाचे शटर चे कुलूप तोडून दुकानात चोरी करत असल्याचे मी पाहिले. आरोळ्या मारताच चोर पळून गेल्याचे सांगितले.
मनीष सोनार यांनी दुकानात येऊन पाहिले असता दुकानातील १ लाख २० हजार रूपयांचे ४१ ग्राम सोन्याचे दागिने ,सहा अंगठ्या , ५० हजार रुपयांचे दीड किलो चांदीचे दागिने व ५० हजार रुपये रोख आणि एक हजार रुपयांचे इलेक्ट्रिक साहित्य असा २ लाख २१ हजार रुपयांचा मुद्देमाल चोरून नेल्याचे निदर्शनास आले. मनीष याने रात्रीच पोलिसांना कळवले. घटनास्थळी डीवायएसपी राकेश जाधव ,पोलीस निरीक्षक विजय शिंदे ,पोलीस उपनिरीक्षक अनिल भुसारे यांच्यासह पोलिसांनी भेट देऊन पंचनामा केला. जळगाव येथून ठसे तज्ज्ञ मागवण्यात आले होते.
चोरटे सराईत असल्याचे दिसून आले. चोरी करताना त्यांनी सीसीटीव्ही कॅमेऱ्याचा डीव्हीआर देखील चोरून नेला आहे. चोरटे ज्या चारचाकीतून आले ती देखील चोरट्यानी शहरातून पिंपळे रोडववरील समर्थ नगर मधून चोरली होती. दीपक गोपाल पाटील रा. कोल्हापूर हा आईवडीलांकडे अमळनेर येथे आला होता. त्याची ७० हजार रुपये किमतीची चार चाकी क्रमांक एम एच ०९ ,ए क्यू १५५९ ही त्याच्या अंगणातून चोरून नेली. दीपक याच्या फिर्यादीवरून चोरीचा गुन्हा दाखल करण्यात आला आहे. घरफोडीचा तपास सहाय्यक पोलीस निरीक्षक राकेशसिंग परदेशी तर कार चोरीचा तपास हेडकॉन्स्टेबल कैलास पवार करीत आहेत.
