भुसावळ (प्रतिनिधी) – तालुक्यातील पिंपळगाव फाट्याजवळ भरधाव वेगाने धावणार्‍या बसने दुचाकीला जबर धडक दिली. यात दुचाकीवरील तीन युवकांचा मृत्यू झाल्याची दुर्घटना सोमवारी दुपारी घडली आहे. वरणगाव पोलीस स्थानकात घटनेची नोंद घेण्यात येत आहे.
अपघातात सचिन राजेंद्र शेळके (२६), जितेंद्र कैलास तावरे (३२), भागवत प्रल्हाद शेळके (४३) यांचा मृत्यू झाल्याचे दिसून आले आहे. बोदवड येथे जात असलेल्या भुसावळ आगाराच्या (एमएच २० बीएल ०९४८) क्रमांकाच्या बसने (एमएच १९ सीएस ११९८) क्रमांकाच्या दुचाकीला जोरदार धडक दिली. यात बोदवडहुन वरणगाव जात असलेल्या दुचाकीवरील तिन्ही युवकांचा मृत्यू झाला. ही घटना भुसावळ तालुक्यातील सुसरी फाट्याजवळ दुपारी घडली. हे तिन्ही युवक बोदवड तालुक्यातील मनूर बु. गावातील असल्याचे समजते.
याप्रकरणी बस चालक दिलीप आप्पा काळे रा. वरणगाव फॅक्टरी ता. भुसावळ यास अटक करण्यात आली आहे. अपघाताची माहिती मिळताच परिसरातील नागरिकांनी घटनास्थळी धाव घेतली होती. वरणगावच्या ग्रामीण रूग्णालयात युवकांचे मृतदेह आणण्यात आले होते. तर वरणगाव पोलीस स्थानकात या प्रकरणी नोंद करण्याचे काम सुरू होते. तपास एपीआय आशिष अडसूळ करीत आहेत.
