जळगाव ( प्रतिनिधी ) – हरिविठ्ठल नगरातील धनगरवाड्यात कौटुंबिक वादातून एकाने गळफास लावून आत्महत्या केल्याची घटना आज दुपारी घडली .
गणेश आत्माराम बडगुजर (वय- ४८ , रा. धनगर वाडा, हरिविठ्ठल नगर ) असे मयताचे नाव आहे. गणेश बडगुजर यांच्या घरात दोन महिन्यापासून लहान मुलीचे लग्न झाल्यापासून भांडण सुरु होते. पत्नी प्रतिभा बडगुजर भांडणाला कंटाळून मोठ्या मुलीकडे राहत होत्या. तिथून त्या जैन इरिगेशन येथे कामाला जात होत्या. आज त्या मोठ्या मुलीसोबत घरी आल्या होत्या, गणेश यांच्यासह बहीण व आई घरी होते. यावेळी पुन्हा या सर्वांचे भांडण झाले. गल्लीतील लोकांनी दाम्पत्यास समजविण्याचा प्रयत्न केला. मात्र, पत्नी व मोठी मुलगी घरातून निघून गेली. यापाठोपाठ मृताची आई व बहिणही घरातून बाहेर गेले त्यानंतर गणेश यांनी गळफास लावल्याची घटना घडली. बहिणीला सोडून आल्यानंतर मृताच्या आईने दार उघडले असता घरात छोट्याशा दोरीने गणेशने गळफास घेतलेल्या अवस्थेत दिसला, आईचा आक्रोश ऐकून गल्लीतील लोक घटनास्थळी धावले.
