जळगाव (प्रतिनिधी) – आर.आर. विद्यालयाच्याजवळ असलेल्या एका रुग्णालयात महिला सुरक्षा रक्षकाचा सुपरवायझरने विनयभंग करून मानसिक त्रास दिल्याची तक्रार करण्यात आली आहे. जिल्हापेठ पोलीस ठाण्यात संशयित आरोपीवर गुन्हा दाखल करण्यात आला आहे.
शहरातील एका भागात राहणारी ३१ वर्षीय महिला ही आपल्या परिवारासह वास्तव्याला आहे. शहरातील एका रुग्णालयात महिला हि सुरक्षा रक्षक म्हणून नोकरीला आहे. त्याच रुग्णालयात खालीद अहमद बुऱ्हानोद्दीन काझी रा. जळगाव हा सुपरवायझर म्हणून नोकरीला आहे. गेल्या काही दिवसांपासून खालीद महिलेकडे वाईट नजरेने बघत होता. महिला दिनाच्या दिवशी ८ मार्च रोजी सकाळी ८ वाजता पिडीत महिला ही नेहमीप्रमाणे कामावर आली. हजेरी लावण्यासाठी थम्ब मशीनजवळ आली असतांना खालीद याने तिला थम्ब करून दिले नाही.
महिलेला अपशब्द करून तिला लज्जा उत्पन्न होईल असे कृत्य करत तिचा विनयभंग केला. हा प्रकार घडल्यानंतर दुसऱ्या दिवशी गुरूवार ९ मार्च रोजी रात्री ८ वाजता महिलेने जिल्हापेठ पोलीस ठाण्यात धाव घेवून तक्रार दिली. त्यांनी दिलेल्या तक्रारीवरून संशयित आरोपी खालीद अहमद बुऱ्हानोद्दीन काझी रा. जळगाव यांच्या विरोधात गुन्हा दाखल करण्यात आला आहे. पुढील तपास पोलीस नाईक अलका शिंदे करीत आहे.
