यावल (प्रतिनिधी) :- यावल-भुसावळ मार्गावरील अंजाळे जवळच्या मोर नदी पुलावर गुरुवारी सायंकाळच्या सुमारास चारचाकी व दुचाकी वाहनांच्या तिहेरी भीषण अपघातात तीन जण गंभीर जखमी झाले आहेत.
भुसावळ कडून कार क्रमांक एम. एच. १९ बी. यु. ३०८५ घेऊन अज्ञात चालक येत होता. तर यावल कडून भुसावळ कडे दुचाकी दुध विक्री करीता अरविंद प्रभाकर पाटील (वय ४५ रा. बोरावल) हे मोटरसायकलने जात होते. त्यांच्या मागे अंजाळे येथुन भुसावळ कडे पिंटू शेकोकार व त्यांचा मुलगा सोहम शेकोकार (वय १३ दोघं रा. अंजाळे) हे भुसावळ येथे दुध विक्रीस जात होते. या दोन्ही दुचाकींना मोर नदी पुलावरून भुसावळ कडून भरधाव वेगात येणारे एमएच १९ बि.यु ३०८५ या क्रमांकाच्या कारने धडक दिली. दुचाकीवर मागे बसलेला सोहम शेकोकार हा पुलावरून नदीपात्रात कोसळला व इतर दोन्ही दुचाकी चालकांसह बालक तिघे जण गंभीर जखमी झाले आहेत.
या जखमींना तात्काळ घटनास्थळी उपस्थित नागरिकांच्या मदतीने भुसावळच्या एका खाजगी रुग्णालयात दाखल करण्यात आले. अपघातानंतर कार चालक हा पसार झाला. यावल पोलिसांना माहिती या अपघाताची मिळाली. त्यांनी घटनास्थळी जाऊन माहिती घेतली.
