जळगाव शहरातील एमआयडीसी पोलिस ठाण्याच्या हद्दीत घटना
जळगाव (प्रतिनिधी) – शहरात नवीन रुग्णालयाचे काम सुरु करायचे असून, त्यात तुम्हाला पार्टनर बनवितो, असे आमीष दाखवत जळगाव शहरातील एकाने हॉटेल व्यावसायीकाची तब्बल २० लाख ७३ हजार रुपयांमध्ये फसवणूक केल्याचा प्रकार उघडकीस आला आहे. या प्रकरणी बुधवारी एमआयडीसी पोलिस ठाण्यात एकाविरुध्द गुन्हा दाखल करण्यात आला आहे.
मोहम्मद शोएब अब्दुल (वय ३०, रा.सदगुरु अपार्टमेंट, शाहुनगर) हे जळगाव शहरात हॉटेलचा व्यवसाय करतात. दिनांक १५ जून ते ६ डिसेंबर २०२४ दरम्यान मोहसीन गुलाब पिंजारी (रा.संगम बेकरीजवळ) यांनी मोहम्मद शोएब अब्दुल यांना जळगाव शहरात एक रुग्णालय सुरु करणार असल्याचे सांगितले. त्यासाठी मोहसीन पिंजारी याने मोहम्मद शोएब अब्दुल यांच्याकडून सुरुवातीला १४ लाख ७३ हजार रुपये हातउसनवारीवर घेतले. त्यानंतर पुन्हा साक्षीदार वसीम अख्तर जमील अख्तर याच्याकडूनही ६ लाख रुपये घेतले, अशी २० लाख ७३ हजार रुपयांची रक्कम घेऊन, रुग्णालयात पार्टनरही केले नाही. दुसरीकडे घेतलेली रक्कम देखील परत केली नाही. मोहम्मद शोएब अब्दुल यांना आपली फसवणूक झाल्याचे लक्षात आल्यानंतर बुधवारी एमआयडीसी पोलिस ठाण्यात जाऊन मोहसीन गुलाब पिंजारी याच्यावर फसवणुकीचा गुन्हा दाखल करण्यात आला आहे.
