रावेर पोलिसांची मोठी कारवाई
रावेर ( प्रतिनिधी ) – बऱ्हाणपूर येथील एका मसाला व्यापाऱ्याच्या कर्मचाऱ्यांना अडवून ८ लाख रुपये लुटणाऱ्या टोळीचा रावेर गुन्हे शोध पथकाने पर्दाफाश केला आहे. या प्रकरणी ७ संशयित आरोपींना अटक करण्यात आली असून त्यांच्याकडून साडेतीन लाख रुपयांचा मुद्देमाल जप्त करण्यात आला आहे.
बऱ्हाणपूर येथील मसाला व्यापारी दीपक सुरेश धर्मानी यांनी ६ फेब्रुवारी २०२६ रोजी त्यांचे कर्मचारी गौरव वाघ आणि तौफिक तेली यांना सावदा, फैजपूर आणि रावेर भागात वसुलीसाठी पाठवले होते. रात्री ९ वाजेच्या सुमारास खानापूर आरटीओ बॅरेलजवळ ८ ते ९ इसमांनी त्यांची दुचाकी अडवून पैशांची बॅग हिसकावून नेली होती. याप्रकरणी ७ फेब्रुवारी रोजी रावेर पोलीस स्टेशनमध्ये गुन्हा दाखल करण्यात आला होता.
असा लागला तपासाचा सुगावा
पोलिस निरीक्षक डॉ. विशाल जयस्वाल यांच्या मार्गदर्शनाखाली पथकाने तपास सुरू केला. घटनास्थळी सीसीटीव्ही नसल्याने आणि रात्रीची वेळ असल्याने सुरुवातीला अडचणी आल्या. पोलिसांनी रावेर, सावदा आणि फैजपूर परिसरातील तब्बल ६७ सीसीटीव्ही फुटेज तपासले. तपासादरम्यान गोपनीय माहिती मिळाल्यानंतर पोलिसांनी रावेरमधील बंडू चौक परिसरातील ७ जणांना ताब्यात घेतले.
अटक करण्यात आलेले आरोपी
१) फारुख शेख रईस (१९)
२) अत्ताउल्लाह खान दाऊद खान उर्फ सोनू
३) शेख सईद शेख कादर उर्फ सुपडू
४) शेख समीर शेख कलीम उर्फ चिकू
५) राहील खान दाऊद खान
६) रहेमान खान अय्युब खान उर्फ भुऱ्या
७) अक्रम खान इस्माईल खान.
मुद्देमाल जप्त आणि मुख्य आरोपी फरार
पकडलेल्या आरोपींकडून पोलिसांनी २,५५,००० रुपये रोख आणि ९५,००० रुपये किमतीच्या दोन मोटारसायकल, असा एकूण ३,५०,००० रुपयांचा मुद्देमाल जप्त केला आहे. या प्रकरणातील मुख्य आरोपी ‘शेख हसन शेख अफजल उर्फ हसन फावड्या’ हा सराईत गुन्हेगार असून तो सध्या फरार आहे. पोलीस त्याचा कसून शोध घेत आहेत. न्यायालयाने आरोपींना २६ फेब्रुवारी २०२६ पर्यंत पोलीस कोठडी सुनावली आहे.
ही कारवाई जळगाव पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपअधीक्षक अनिल बडगुजर यांच्या मार्गदर्शनाखाली रावेर पोलीस निरीक्षक डॉक्टर विशाल जयस्वाल उपनिरीक्षक तुषार पाटील, सुनील वंजारी, कल्पेश आमोदकर, प्रमोद पाटील विशाल पाटील, सुकेश तडवी, श्रीकांत चव्हाण, विकारुद्दीन शेख, अतुल गाडीलोहार, गौरव बोने आणि सायबर विभागाच्या मिलिंद जाधव, गौरव पाटील या पथकाने यशस्वीरित्या पूर्ण केली.
