लक्ष्मीनगरात घर फोडून फ्रिज, टीव्ही, कुलरसह ५२ हजारांचा ऐवज लंपास
जळगाव (प्रतिनिधी) – जळगाव शहरातील लक्ष्मी नगर परिसरात मंगळवारी रात्री चोरट्यांनी एका सेवानिवृत्त वृद्धाचे बंद घर फोडून मोठ्या प्रमाणात ऐवज लंपास केल्याची धक्कादायक घटना उघडकीस आली आहे. या घटनेमुळे परिसरात भीतीचे वातावरण निर्माण झाले असून, चोरट्यांचा शोध घेण्यासाठी पोलिसांनी तपास सुरू केला आहे.
मिळालेल्या माहितीनुसार, राजेंद्र जगन्नाथ दुसाने (वय ६२, रा. लक्ष्मी नगर, जळगाव) हे आपल्या कुटुंबियांसह वास्तव्याला आहेत. ११ नोव्हेंबर रोजी त्यांचे घर बंद असताना अज्ञात चोरट्यांनी संधी साधून घराचे कुलूप तोडत आत प्रवेश केला आणि घरातील फ्रिज, टीव्ही, कुलर, गॅस हंडी, पातेले यांसह इतर घरगुती साहित्य असा एकूण ५२ हजार रुपयांचा ऐवज चोरून नेला.
चोरीचा प्रकार मंगळवारी रात्री ११ वाजता उघडकीस आला. याप्रकरणी राजेंद्र दुसाने यांनी दिलेल्या फिर्यादीनुसार एमआयडीसी पोलीस ठाण्यात अज्ञात चोरट्यांविरोधात गुन्हा दाखल करण्यात आला असून, पोहेकॉ गिरीश पाटील हे पुढील तपास करीत आहेत.
