विवाहितेचा गळफास, आईचा मृतदेह पाहून चिमुकल्या झाल्या सुन्न…
चोपडा तालुक्यातील सुटकार येथील घटना
चोपडा (प्रतिनिधी) – तालुक्यातील सुटकार येथील २७ वर्षीय विवाहितेने घरी कोणी नसताना गळफास लावून आत्महत्या केल्याची घटना शुक्रवारी दुपारी २ वाजेच्या सुमारास उघडकीला आली आहे. अडावद पोलीस स्टेशनला अकस्मात मृत्यूची नोंद करण्यात आली आहे.
शीतल संदीप ठाकरे (वय २७, रा. सुटकार ता. चोपडा) असे मयत विवाहितेचे नाव आहे. पती, सासू सासरे, दोन मुली यांच्यासह ती गावात राहत होती. शेती करून ते गुजराण करतात. शुक्रवारी घरातील मंडळी शेतीकामाला गेलेली होती. घरात फक्त शीतल ठाकरे ह्याच होत्या. दुपारच्या वेळी त्यांनी गळफास घेतला. दरम्यान, काही वेळांनंतर शाळेतून त्यांच्या दोन्ही मुली (दोन्हींचे वय ३ ते ५ वर्ष) घरी आल्यावर त्यांना त्यांच्या आईने गळफास घेतल्याचे दिसून आले. काही क्षण त्या कोवळ्या जीवांना काहीच कळले नाही. आरडाओरडा करीत त्यांनी शेजारपाजारच्यांना सांगितले. तेव्हा घटना उघडकिस आली.
त्यानंतर घरातील कुटुंबीय शेतातून घरी आल्यावर मयत विवाहितेस उपजिल्हा रुग्णालयात नेण्यात आले होते. तेथे मृत घोषित करण्यात होते. शीतल ठाकरे यांचे माहेर हे चोपडा तालुक्यातील कोळंबा येथील असून, तालुक्यातील दोन्ही गावातील नातेवाईकांनी उपजिल्हा रुग्णालय येथे गर्दी केली. दरम्यान, घटनेमुळे गावात हळहळ व्यक्त होत असून अडावद पोलीस स्टेशनला अकस्मात मृत्यूची नोंद करण्यात आली आहे. सहायक पोलिस निरीक्षक गणेश बुवा यांचा मार्गदर्शनाखाली पोलिस उपनिरीक्षक जगदीश कोळंबे तपास करीत आहेत.
