धरणगाव तालुक्यातील घटना
धरणगाव (प्रतिनिधी) : येथील गट नंबर १०७ मधील ४ हेक्टर जागा ही पाच संशयित आरोपींनी तोतयागिरी करून धरणगाव दुय्यम उपनिबंधक कार्यालयात दिशाभूल करून खरेदी विक्री केल्याचा धक्कादायक प्रकार समोर आला आहे. याप्रकरणी गुरुवारी दि. १८ जुलै रोजी दुपारी १२ वाजता धरणगाव पोलीस ठाण्यात ५ जणांविरोधात गुन्हा दाखल करण्यात आला आहे.
अब्दुल हुसेन अली बोहरा (वय-७२, रा. बुऱ्हानपूर, मध्य प्रदेश) हे कुटुंबासह वास्तव्याला आहे. जिनिंग कंपनी चालवून ते उदरनिर्वाह करतात. धरणगाव तालुक्यातील विवरे शिवारातील गट नंबर १०७ मधील ४ हेक्टर ७४ आर ही जागा त्यांचे मयत झालेले वडीलांच्या नावावर आहे. दरम्यान त्यांच्या वडीलांचे नाव हूसेन अली सराफ अली बोहरी असे होते. याच नावाने असलेल्या नाशिक येथील एकाने तोतयागिरी करून पावर ऑफ ऍटर्नीद्वारे दि. २२ जून ते ६ जुलै २०२३ या कालावधीत हसेन अली सराफ अली बोहरी या तोतयाने धरणगाव दुय्यम निबंधक कार्यालयात कागदपत्र सादर करून प्रमोद लक्ष्मण वाणी रा.पारोळा, योगेश भुरा धनगर रा. नंदुरबार, नरेंद्र रतीलाल धनगर रा, विरदेल ता. शिंदखेडा आणि हुसेन हाशिमभाई मर्चंट रा. नंदुरबार यांना सोबत घेवून ही जागा खरेदी विक्री केल्याचे दाखविले.
त्यानंतर ही जागा प्रमोद लक्ष्मण वाणी रा. पारोळा आणि योगेश भूरा धनगर रा. नंदुरबार या दोघांची नावे तलाठीकडे जावून लावून घेतले. हा प्रकार अब्दुल हुसेन अली बोहरा यांच्या लक्षात आल्यानंतर त्यांनी गुरूवारी १८ जुलै रोजी दुपारी १२ वाजता धरणगाव पोलिसात धाव घेऊन तक्रार दिली. त्यानुसार प्रमोद लक्ष्मण वाणी रा.पारोळा, योगेश भुरा धनगर रा. नंदुरबार, नरेंद्र रतीलाल धनगर रा, विरदेल ता. शिंदखेडा आणि हुसेन हाशिमभाई मर्चंट रा. नंदुरबार आणि तोतया तोतया हासन अली सराफ अली बोहरी रा. सातपूर, नाशिक याच्या विरोधात धरणगाव पोलीसात गुन्हा दाखल करण्यात आला आहे. या घटनेचा पुढील तपास पोलीस कॉन्स्टेबल महेंद्र बागुल हे करीत आहे.
