जळगावात रामेश्वर कॉलनीतील घटना
जळगाव ( प्रतिनिधी ) – शहरातील रामेश्वर कॉलनी येथे सोमवारी सकाळी ११.३० वाजता एक महाविद्यालयीन विद्यार्थिनीने आत्महत्या केल्याची घटना घडली आहे. एमआयडीसी पोलीस स्टेशनला अकस्मात मृत्यूची नोंद करण्यात आली आहे.
खुशी चैत्राम जाधव (वय १७) असे मयत मुलीचे नाव आहे. खुशीची आई रंजनाबाई या शहरातील एका रुग्णालयात कामाला आहेत, तर वडील चैत्राम जाधव एमआयडीसी मधील एका कंपनीत कार्यरत आहेत. खुशीचा भाऊ मयूरदेखील एका कंपनीत कामाला आहे.(केसीएन)खुशीचा भाऊ मयूर जाधव तिच्या अकरावीच्या प्रवेशासाठी महाविद्यालयात गेला होता. त्यावेळी घरात कोणीही नव्हते. मयूर घरी परतल्यानंतर त्याला खुशी गळफास घेतलेल्या अवस्थेत दिसली. हा धक्कादायक प्रकार पाहून त्याने हंबरडा फोडला.
त्याच्या आवाजाने शेजारी धावून आले आणि त्यांनी तात्काळ खुशीला शासकीय वैद्यकीय महाविद्यालय व रुग्णालयात उपचारासाठी दाखल केले. मात्र, डॉक्टरांनी तपासणी करून तिला मृत घोषित केले. अत्यंत दुर्दैवी बाब म्हणजे, ज्यावेळी तिच्या अकरावीच्या प्रवेशाची प्रक्रिया सुरू होती, त्याचवेळी तिने हे टोकाचे पाऊल उचलले. या घटनेमुळे जाधव कुटुंबावर शोककळा पसरली आहे. खुशीने आत्महत्या का केली, याचे कारण अद्याप समजू शकलेले नाही. दरम्यान, या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली असून, पोलीस अधिक तपास करत आहेत.
