भुसावळ तालुक्यातील साकेगाव तालुक्यातील घटना
भुसावळ (प्रतिनिधी) : तालुक्यातील साकेगाव ते भानखेडा रस्त्यावरील झाडांच्या फांद्या तोडत असतांना विद्यूत तारांना धक्का लागल्याने साकेगाव येथील ३६ वर्षीय तरूणाचा जागीच मृत्यू झाल्याची घटना मंगळवारी दि. १६ एप्रिल रोजी दुपारी ४ वाजेच्या सुमारास घडली. याप्रकरणी शनीपेठ पोलीस ठाण्यात अकस्मात मृत्यूची नोंद करण्यात आली आहे.
किशोर पंढरीनाथ कोळी (वय ३६ रा. साकेगाव ता. भुसावळ) असे मयत झालेल्या तरूणाचे नाव आहे. साकेगाव येथे किशोर कोळी हा तरूण पत्नी कल्पना आणि आई जनाबाई, २ विवाहित बहिणी यांच्यासोबत वास्तव्याला होता. शेतातील मूजरीचे काम करून तो उदरनिर्वाह करत होता. मंगळवारी १६ एप्रिल रोजी किशोर हा साकेगाव ते भानखेडा रस्त्यावरील शेतातील बांधावर असलेल्या झाडाच्या फांद्या तोडत होता. त्यावेळी झाडाजवळून गेलेल्या महावितरण कंपनीच्या विद्यूत तारांचा स्पर्श झाल्याचे त्याला विजेचा जोरदार धक्का बसला व तो झाडावरून खाली पडला. त्यात त्याचा जागीच मृत्यू झाला.
त्याला ग्रामस्थांनी तातडीने जळगाव येथील शासकीय वैद्यकीय महाविद्यालयात दाखल केले असता वैद्यकीय अधिकारी डॉ. सुशांत निकुंभ यांनी मयत घोषीत केले. याबाबत शनीपेठ पोलीस ठाण्यात अकस्मात मृत्यूची नोंद करण्यात आली आहे.
