मध्यप्रदेशात झाला होता अपघात, रावेर तालुक्यात शोककळा
रावेर (प्रतिनिधी) :- अवैध वाळू वाहतूक करणाऱ्या ट्रॅक्टरच्या धडकेत जखमी झालेले बोरखेडा येथील पोलीस पाटील अरूण पाटील यांचा उपचारादरम्यान मृत्यू झाला. हा अपघात दि. १८ रोजी बऱ्हाणपूर-अमरावती महामार्गावर मध्य प्रदेशातील सिरपूर गावाजवळ दुपारी झाला होता.
अरूण शांताराम पाटील (वय ४१) हे पत्नीसह मध्य प्रदेशातील सिरपूर जि. बऱ्हाणपूर येथून मोटारसायकलने घरी परतत होते. तेव्हा मार्गात एका भरधाव ट्रॅक्टरने त्यांना व त्यांच्या मागील दुसऱ्या मोटरसायकलला जबर धडक दिली. यात ते गंभीर जखमी झाले. बऱ्हाणपूर येथील रुग्णालयात उपचार सुरू असताना दि. १८ रोजी रात्री त्यांचा मृत्यू झाला. त्यांची पत्नी सविता पाटील, दुसऱ्या मोटर सायकलवरील वडील व मुलगा यांच्यावर बऱ्हाणपूरला उपचार सुरू आहेत. खकनार पोलिसात ट्रॅक्टरवरील चालकावर गुन्हा दाखल झाला आहे. यामुळे रावेर तालुक्यात शोककळा पसरली आहे.
