रावेर ( प्रतिनिधी ) — येथील ग्रामीण रुग्णालयाचे वैद्यकीय अधीक्षक डॉ. एन. डी. महाजन यांची बनावट सही, शिक्का वापरलेले पत्र तयार करून मुंबई येथील वरिष्ठ कार्यालयास बदली मेळघाट ( गडचिरोली ) येथे व्हावी अशी मागणी केल्याचे उघड झाले.
डॉ. एन. डी. महाजन यांनी रावेर पोलिसांत तक्रार दाखल करत, जिल्हाधिकारी , पोलीस अधीक्षक, जिल्हा शल्य चिकित्सक यांच्याकडे देखील सखोल चौकशीची मागणी केली आहे.
येथील ग्रामीण रुग्णालयाचे डॉ.एन.डी.महाजन यांनी कोरोना काळात जबाबदारीने कार्य पार पाडले. वेळेत ऑक्सिजन , उपचार देता आले.अनेक रुग्णांना जीवनदान मिळाले आहे.मात्र त्यांच्या कामाची पद्धत आणि ग्रामीण रुग्णालयात कुणाचा हस्तक्षेप खपवून घेण्यास त्यांचा मज्जाव असल्याने , त्यांना यंत्रणेतून विरोध झाल्याचे अलीकडे घडले असतांना , आता आणखी लेटर बॉम्ब उघडकीस आला आहे . त्यांच्या कार्यालयातील लेटरपॅडसारखी खोटी लेटरपॅड तयार करून मेडिकल ऑफिसर रुरल हॉस्पिटल रावेर या नावाचा खोटा शिक्का करून प्रिन्सिपल सेक्रेटरी मुंबई यांच्याकडे खोट्या सहीने मेळघाट किंवा गडचिरोलीमध्ये बदली करून मिळावी अशी मागणी केलेले बनावट पत्र देण्यात आल्याची माहिती त्यांना मिळाली आता त्यांनी पत्राची नक्कल आणि त्यावरील जावक नंबर घेऊन पोलिसात तक्रार केली आहे.या पत्रावरील जावक क्रमांकदेखील खोटा आहे.पत्र त्यांच्याकडे टाईप केलेले नसल्याचे डॉ.महाजन यांचे म्हणणे आहे. पत्र ११ जून रोजी पाठवण्यात आले आहे. त्यामुळे त्यांना मनस्ताप होत आहे. सखोल चौकशी करण्याची मागणी त्यांनी केली आहे.
