जळगाव तालुक्यात चिंचोली गावाजवळील घटना
जळगाव ( प्रतिनिधी ) – तालुक्यातील चिंचोली गावाजवळ सिमेंट वाहतूक करणारा ट्रॅक्टर आणि मालवाहू पिकअप वाहनाने दिलेल्या धडकेत ट्रॅक्टरवरील कामगाराचा दुर्दैवी मृत्यू झाल्याची घटना शुक्रवारी १९ डिसेंबर रोजी दुपारी २ वाजता घडली आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली.
संजय नामदेव सोनवणे (वय ४० रा. गेंदालाल मील, जळगाव) असे मयत कामगाराचे नाव आहे. शहरातील गेंदालाल मिल परिसरात संजय सोनवणे हा तरूण आपल्या कुटुंबियांसह वास्तव्याला होते. ते मालधक्क्यावरून सिमेंटच्या गोण्या वाहतूक करण्याचे काम करून आपल्या कुटुंबाचा उदरनिर्वाह करत होते.
नेहमीप्रमाणे शुक्रवारी १९ डिसेंबर रोजी सकाळी ते इतर मजूरांसह सिमेंट भरून चिंचोली गावाकडे ट्रॅक्टरने (क्रमांक एमएच १९ बीजी ६०७८) गेले. सिमेंटच्या गोण्या खाली करून जळगावकडे परतत असतांना समोरून येणारी मालवाहू पिकअप वाहनाने त्यांच्या ट्रॅक्टरला जोरदार धडक दिली. या धडकेत संजय सोनवणे यांच्या डोक्याला गंभीर दुखापत झाली.
जखमी अवस्थेत त्यांना शासकीय वैद्यकीय महाविद्यालयात दाखल करण्यात आले असता वैद्यकीय अधिकारी यांनी तपासणी केल्यानंतर मयत घोषीत केले. या संदर्भात एमआयडीसी पोलीस ठाण्यात अकस्मात मृत्यूची नोंद करण्यात आली.
