जळगाव शहरातील शिवतीर्थ मैदानातील घटना
जळगाव ( प्रतिनिधी ) – शहरातील मध्यवर्ती भागात असणाऱ्या शिवतीर्थ मैदानावर गवळी प्रीमियर लीगचा शुक्रवारी पहिलाच दिवस असताना, सातवा सामना संपल्यानंतर खंडवा संघाचा अष्टपैलू खेळाडू गणेश यादव (वय ४२ रा. खंडवा) यांचा मैदानातच हृदयविकाराच्या तीव्र झटक्याने मृत्यू झाला. यामुळे आयोजकांनी प्रीमियर लीग स्पर्धा रद्द केली आहे.
गणेश यादव याने सामन्यात आक्रमक खेळी करून आपल्या संघाला विजय मिळवून दिला, मात्र त्या सामन्याचा ‘मॅन ऑफ द मॅच’ हा पुरस्कार स्वीकारण्यापूर्वीच काळाने त्यांच्यावर घाला घातला. गणेश यादव यांनी या स्पर्धेतील पहिला सामना खेळताना नेत्रदीपक कामगिरी केली. अवघ्या १८ चेंडूत ४४ धावा केल्या. तसेच गोलंदाजी करताना २ महत्त्वपूर्ण विकेट्स घेतल्या.
सामन्यात अष्टपैलू कामगिरीमुळे गणेश यादव यांची ‘सामनावीर म्हणून निवड केली होती. सामना संपल्यानंतर बक्षीस वितरणाची तयारी सुरू होती. गणेश यादव हे सामनाविराचा पुरस्कार स्वीकारण्यासाठी सज्ज असतानाच त्यांना मैदानावर हृदयविकाराचा तीव्र झटका आला आणि ते खाली कोसळले. उपस्थित खेळाडू आणि आयोजकांनी त्यांना तात्काळ उपचारासाठी रुग्णालयात दाखल केले. मात्र, डॉक्टरांनी तपासून उपचारापूर्वीच त्यांना मृत घोषित केले.
या धक्कादायक घटनेमुळे क्रीडा क्षेत्रात आणि गवळी समाजात हळहळ व्यक्त केली जात आहे. गणेश यादव यांच्या निधनानंतर स्पर्धेच्या आयोजकांनी आणि गवळी समाजाच्या खेळाडूंनी तातडीने बैठक घेऊन उर्वरित ‘गवळी प्रीमियर लीग’ रद्द करण्याचा निर्णय घेतला.
