पाचोरा ( प्रतिनिधी ) – जळगावात जिल्हाधिकारी कार्यालयावर उद्या काढण्यात येणाऱ्या मोर्चात पाचोरा व भडगाव तालुक्यातील हजारो शेतकऱ्यांचा सहभाग असेल असे भाजपचे पाचोरा तालुकाध्यक्ष अमोल शिंदे यांनी सांगितले .
भाजपाच्यावतीने आमदार गिरीश महाजन, भाजपा जिल्हाध्यक्ष आमदार राजूमामा भोळे, खासदार उन्मेषदादा पाटील यांच्या नेतृत्वात व पाचोरा तालुकाध्यक्ष अमोल शिंदे व भडगाव तालुकाध्यक्ष अमोल पाटील यांच्या मार्गदर्शनाखाली भाजपा किसान मोर्चाच्या माध्यमातून पाचोरा व भडगाव तालुक्यातील शेतकरी १ नोव्हेंबररोजी जिल्हाधिकारी कार्यालयावर मोर्चातून समस्या मांडणार आहेत.
रब्बीच्या सुरुवातीसाठी पाण्याची गरज असतांना ट्रान्सफार्मर व वीज पुरवठा खंडित करून सक्तीची वीज वसुली थांबवावी. रात्री ऐवजी दिवसा शेतीला नियमित वीज पुरवठा करण्यात यावा. अतिपावसामुळे जाहीर झालेल्या तुटपुंज्या मदतीऐवजी वाढ करून दिवाळीआधी शेतकऱ्यांच्या खात्यात भरपाई रक्कम जमा करावी. पिक विमा योजना सन २०२०- २०२१ अंतर्गत कापूस, उडीद, मुंग, सोयाबीन, इ. नुकसानग्रस्त पात्र शेतकऱ्यांची रक्कम तात्काळ बँक खात्यात जमा करण्यात यावी. सन २०१८ व सन २०१९ मध्ये आलेल्या चक्रीवादळ मुळे झालेल्या नुकसान भरपाईची प्रलंबित रक्कम तात्काळ शेतकऱ्यांच्या खात्यांत जमा करावी भडगाव तालुक्यात जून २०१९ मध्ये झालेल्या वादळी वारा व गारपिटीची तसेच मार्च २०२१ मध्ये झालेल्या शेतकऱ्यांच्या भरपाईची रक्कम तात्काळ बँक खात्यात जमा करण्यात यावी . पाचोरा व भडगाव तालुक्यात जनावरांवरिल लम्पी आजाराचा वाढता प्रादुर्भाव बघता प्रत्येक गाव पातळीवर जाऊन गुरांचे लसीकरण करण्यात यावी , अशा मागण्या शेतकऱ्यांसमोर मांडल्या जाणार आहेत .
.याप्रसंगी जि.प. सदस्य मधुकर काटे, जिल्हाचिटणीस सोमनाथ पाटील , विधानसभा क्षेत्रप्रमुख हिम्मतसिंग निकुंभ,शहराध्यक्ष रमेश वाणी, किसान मोर्चा पाचोरा तालुकाध्यक्ष विश्वास पाटील, भडगाव तालुकाध्यक्ष यशवंत पाटील, सरचिटणीस गोविंद शेलार, संजय पाटील, दीपक माने, भाजयुमो तालुकाध्यक्ष मुकेश पाटील, शहराध्यक्ष समाधान मुळे, सुनील पाटील, भैया ठाकूर आदी पदाधिकारी उपस्थित होते.
