दोघांना अटक, तीन फरार ;
एक पोलीस जखमी
एरंडोल (प्रतिनिधी) – सोमवारी पहाटे साडेतीन वाजता रात्री गस्त घालत असताना एका स्कॉर्पिओ चालकाला पारोळा पोलिसांनी वाहन थांबविण्यास सांगितले. मात्र वाहन न थांबविता त्यांनी वाहन भरधाव हाकले. पोलिसांनी पाठलाग सुरु केला. संशयित चोरटे हे पारोळा, कासोदा, एरंडोल मार्गे भडगावात गेल्यावर तेथील शासकीय वाहनाला धडकले. तेव्हा त्यातील दोघांना ताब्यात घेण्यात आले. तर तिघे फरार होण्यात यशस्वी झाले आहे.
पारोळा पोलीस स्टेशनचे पोलीस उपनिरीक्षक राजू जाधव हे त्यांचे सहकारी हवालदार कोळी ,राठोड, मिस्तरी, यांचेसह रात्रीची गस्त घालत होते. पहाटे साडेतीन वाजेच्या सुमारास राष्ट्रीय महामार्गावर पांढऱ्या रंगाची स्कार्पिओ क्रमांक एमएच १८ डब्ल्यू ६७० सह भरधाव वेगाने जात असल्याचे दिसून आले. पोलीस पथकाने थांबण्याचा प्रयत्न केला मात्र चालकाने वाहन न थांबवता भरधाव वेगाने पळवले. त्यामुळे पोलिसांचा संशय बळावल्याने त्यांनी वाहनाचा पाठलाग सुरू केला. पोलीस उपनिरीक्षक राजु जाधव यांनी एरंडोल पोलीस स्टेशनचे उपनिरीक्षक शरद बागल यांच्याशी संपर्क साधून एरंडोल येथे नाकाबंदी करण्याचे सांगितले. उपनिरीक्षक शरद बागल यांनी हवालदार संतोष चौधरी, किरण पाटील यांचे सह धरणगाव चौफुली येथे बॅरिगेट्स लावून नाकाबंदी केली.
तसेच शहरात गस्त घालत असलेले हवालदार संदीप पाटील व सपकाळे यांना घटनेची माहिती देऊन तात्काळ कासोदा रस्त्यावर जाण्याचे सांगितले. एरंडोल व पारोळा येथील पोलीस पथक सदर वाहनाच्या सिनेस्टाईल पाठलाग करीत असताना संशयित वाहनाच्या चालकाने राष्ट्रीय महामार्ग लगत असलेल्या दत्त मंदिराजवळील रस्त्याने वाहन वळवून कासोदाकडे पलायन केले. संशयित वाहन कासोद्याकडे गेल्यामुळे उपनिरीक्षक शरद बागल यांनी नियंत्रण कक्षाशी संपर्क साधून घटनेची माहिती दिली. तसेच कासोदा स्टेशनचे उपनिरीक्षक अमोल गुंजाळ यांच्याशी संपर्क साधून नाकाबंदी करण्यास सांगितले. संशयित स्कार्पिओ चालकाने कासोदा येथील लावण्यात आलेले बॅरिगेट्स उडवून आडगाव मार्गे भडगावकडे पलायन केल्यामुळे उपनिरीक्षक शरद बागल यांनी भडगाव पोलीस निरीक्षक राजेंद्र पाटील यांच्याशी संपर्क साधून माहिती दिली.
पोलीस निरीक्षक राजेंद्र पाटील यांनी भडगाव येथे नाकाबंदी केली. पोलिसांनी भडगाव येथे सदरचे वाहन थांबवण्याचा प्रयत्न केला मात्र स्कार्पियो चालकाने भडगाव पोलीस स्टेशनच्या शासकीय वाहनास धडक दिली. यात पोहेकॉ विलास बाबुराव पाटील यांच्या उजव्या हाताला मुक्कामार लागला आहे. त्यांच्या फिर्यादीवरून भडगाव पोलीस स्टेशन येथे गुन्हा दाखल करण्यात आला आहे. तर पोलिसांच्या वाहनाचे नुकसान झाले आहे.
पोलिसांनी स्कार्पिओसह दोन संशयित मुकेश विठ्ठल पाटील (वय २४ रा पाळधी ता धरणगाव), रोशन मधुकर सोनवणे (वय ३३, अंबिका नगर, वडजाई रोड धुळे) यांना ताब्यात घेतले असून त्यांचे इतर तीन साथीदार अंधाराचा फायदा घेऊन पसार झाले. पोलिसांनी दोन्ही संशयितांची चौकशी केली असता ते गुरे चोरणारे टोळी असल्याची प्राथमिक माहिती मिळाली असून संशयतांकडून अनेक गुन्हे उघडकीस येण्याची शक्यता आहे.
पोलीस अधीक्षक एम राजकुमार, अप्पर पोलीस अधीक्षक रमेश चोपडे, उपविभागीय पोलीस अधिकारी राकेश जाधव यांचे मार्गदर्शनाखाली भडगावचे पोलीस निरीक्षक राजेंद्र पाटील, पारोळ्याचे उपनिरीक्षक राजू जाधव, एरंडोलचे उपनिरीक्षक शरद बागल, कासोद्याचे उपनिरीक्षक अमोल गुंजाळ व पोलीस कर्मचाऱ्यांनी सुमारे दीड तास सिनेस्टाईल पाठलाग करून दोघांना ताब्यात घेतले. पोलिसांनी खाक्या दाखवताच संशयित आरोपींनी इतर सहकारी फैय्याज शेख रा. पाळधी, शशिकांत सदाशिव मोरे, रा मोहाडी जि धुळे यांचेसह पाचवा आरोपी अनोळखी असून नाव माहीत नसल्याचे सागितले.
