जळगाव (प्रतिनिधी) :- तालुक्यातील कडगाव येथील मरीमाता मंदिर परिसरात जुन्या भांडणाच्या कारणावरून एका तरुणाला एकाने शिवीगाळ करत मारहाण करून गंभीर दुखापत केल्याची घटना घडली आहे. या प्रकरणी नशिराबाद पोलीस ठाण्यात गुन्हा दाखल करण्यात आला आहे.
याबाबत सविस्तर वृत्त असे की, मोहन आनंदा कोळी (वय-२४, रा. मरीमाता मंदिराजवळ, कडगाव ता. जि. जळगाव) हा तरुण कुटुंबासह राहायला आहे. शनिवार ३ फेब्रुवारी रोजी दुपारी १ वाजता मोहन हा घरी असताना जुन्या भांडणाच्या कारणावरून गावात राहणारा गणेश बाबुराव कोळी यांनी मारहाण केली. तसेच त्याच्या हाताला दुखापत करून पसार झाला. हा प्रकार घडल्यानंतर जखमी झालेल्या मोहन कोळी याला जळगाव येथील खाजगी रुग्णालयात उपचारांचा दाखल करण्यात आले. त्यानंतर मोहन कोळी यांनी दिलेल्या फिर्यादीवरून मारहाण करणारा संशयित आरोपी गणेश कोळी यांच्या विरोधात नशिराबाद पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक अलियार खान हे करत आहे.
