जळगाव शहरातील शिवाजी नगरातील घटना
जळगाव ( प्रतिनिधी ) – शहरात शिवाजी नगर भागातील एका ३२ वर्षीय तरुणाने राहत्या घरी गळफास घेऊन आपली जीवनयात्रा संपवली आहे. ही घटना गुरुवारी सकाळी उघडकीस आली. जळगाव शहर पोलीस स्टेशनला अकस्मात मृत्यूची नोंद करण्यात आली आहे.
मृत तरुणाचे नाव दीपक वसंत पवार (वय ३२) असे आहे. शिवाजी नगर, जळगाव येथे तो परिवारासह राहत होता. मालवाहू वाहन चालक म्हणून तो उदरनिर्वाह करत होता. घरात झालेल्या घरगुती वादामुळे त्यांची पत्नी माहेरी निघून गेली होती. पत्नी माहेरी गेलेली असताना, बुधवारी मध्यरात्रीच्या सुमारास दीपक यांनी राहत्या घरात गळफास घेतला.
गुरुवारी सकाळी ही बाब निदर्शनास आल्यानंतर शहर पोलिसांनी तातडीने घटनास्थळी धाव घेतली. पोलिसांनी घटनेचा पंचनामा करून मृतदेह उत्तरीय तपासणीसाठी शासकीय वैद्यकीय महाविद्यालयात दाखल केला, जिथे डॉक्टरांनी त्यांना मृत घोषित केले. आत्महत्येचे नेमके कारण अद्याप स्पष्ट झालेले नाही. मृत दीपक यांच्या पश्चात आई, वडील, पत्नी आणि तीन मुले असा परिवार आहे. या प्रकरणी शहर पोलीस ठाण्यात अकस्मात मृत्यूची नोंद करण्यात आली असून पोलीस अधिक तपास करत आहेत.
