जळगाव शहरातील नंदनवन नगरातील घटना
जळगाव (प्रतिनिधी) : शहरातील नंदनवन नगरातील २७ वर्षीय तरूणाने राहत्या घरात गळफास घेवून आत्महत्या केल्याची घटना शुक्रवारी दिनांक ७ जून रोजी सकाळी ७ वाजता उघडकीला आली आहे. याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली. शासकीय वैद्यकीय महाविद्यालयात नातेवाईक व मित्र परिवार यांनी एकच गर्दी केली होती.
दयावान गौतम सोनवणे (वय २७, रा. नंदनवन नगर, रामानंद नगरजवळ, जळगाव) असे मयत तरूणाचे नाव आहे. शहरातील नंदनवन नगर परिसरात दयावान सोनवणे हा तरूण आपल्या आई, वडील, भाऊ आणि पत्नी यांच्यासोबत वास्तव्याला होता. दयावान याला आठ दिवसांपुर्वीच मुलगी झाली होती. घरात आनंदाचे वातावरण असतांना तरूणाच्या जाण्याने दु:खाचा डोंगर कोसळला आहे. मजूरीचे काम करून तो परिवाराचे उदरनिर्वाह करत होता. गुरूवारी ६ जून रोजी रात्री जेवण करून तो राहत्या घरातील वरच्या खोलीत जावून झोपला होता. तर घरातील इतर सर्वजण घरात खालच्या घरात झोपलेले होते.
दरम्यान, मध्यरात्री दयावान याने वरच्या खोलीत गळफास घेवून आत्महत्या केली. शुक्रवारी ७ जून रोजी सकाळी ७ वाजता त्याचा लहान भाऊ कुंदन हा उठविण्यासाठी गेला असता त्याला भाऊ दयावान याने गळफास घेतल्याचे दिसून आले. हा प्रकार लक्षात आल्यानंतर नातेवाईकांनी एकच आक्रोश केला. तात्काळ शासकीय वैद्यकीय महाविद्यालयात कुटुंबीयांनी त्याला दाखल केले.
वैद्यकीय अधिकारी डॉ माधुरी सोसे यांनी तपासणीअंती मयत घोषीत केले. आत्महत्या करण्याचे कारण समोर आलेले नाही. याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली.
