जळगाव शहरात हळहळ
जळगाव (प्रतिनिधी) : शहरातील प्रतापनगर परिसरातील रामा हॉटेल व्यावसायिकाच्या एकुलत्या एक २६ वर्षीय तरुण मुलाचा ह्रदयविकाराच्या झटक्याने मृत्यू झाल्याची घटना शुक्रवारी दि, २६ रोजी पहाटे ४ वाजेच्या दरम्यान घडली.
तेजस सतीश नारखेडे (वय २६, रा. प्रतापनगर, जळगाव) असे मृत झालेल्या युवकाचे नाव आहे. तेजसच्या पश्चात लहान बहिण, वडिल, आई, काका, काकू, आजोबा असा परिवार आहे. तेजसचे वडिल सतीश नारखेडे यांचे प्रतापनगरातच हॉटेल आहे. ती हॉटेल व इतर काम तेजस सांभाळत होता. तेजसच्या घरी गुरुवारी काही नातेवाईक आले होते. नातेवाईकांच्या लहान मुलांसोबत तेजस घरातच रमला होता. जेवण झाल्यानंतर तेजस झोपायला गेला. मध्यरात्री ३ वाजेच्या सुमारास तेजसची अचानक तब्येत बिघडली. तेजसने घरच्यांना उठविले, तेजसला घरीच उलटी झाल्यानंतर तो बेशुध्द पडला. घरच्यांनी तातडीने खासगी रुग्णालयात नेले.
खासगी रुग्णालयात डॉक्टरांनी प्राथमिक तपासणी करून, तेजसला शासकीय वैद्यकीय महाविद्यालय व रुग्णालात दाखल केले. याठिकाणी सीएमओ डॉ. सुशांत निकुंभ यांनी तपासून तेजसचा मृत्यू झाल्याचे घोषित केले. एकुलता एक मुलाचा अचानक मृत्यू झाल्याने तेजसच्या परिवाराला मोठा धक्का बसला आहे. जिल्हापेठ पोलीस स्टेशनला घटनेची नोंद करण्यात आली आहे.
