जामनेर तालुक्यातील शेंदुर्णी गावाजवळील घटना, सार्वे गावात शोककळा
जळगाव (प्रतिनिधी) :- काकांचे निधन झाल्यानंतर त्यांच्या गावी सोयगाव तालुक्यात जाऊन त्यांचा अंत्यविधी कार्य आटोपल्यानंतर पाचोरा तालुक्यातील सार्वे येथील घरी जात असताना रस्त्यात अचानक दुचाकी घसरल्याने जामनेर तालुक्यातील शेंदुर्णी गावाजवळ तरुणाचा भीषण अपघात झाला. गंभीर जखमी दुचाकीस्वाराचा उपचांरादरम्यान मृत्यू झाल्याची घटना शनिवारी ७ डिसेंबर रोजी रात्री १० वाजता घडली आहे. याप्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली आहे.
प्रवीण सदाशिव कोळी (वय २३, रा.सार्वे बुद्रुक ता.पाचोरा) असे मयत दुचाकीस्वाराचे नाव आहे. त्याच्या पश्चात आई-वडील, दोन विवाहित बहिणी असा परिवार आहे. मोलमजुरी करून तो उदरनिर्वाह करत होता. (केसीएन)दरम्यान त्याचे काकाचे निधन झाल्यामुळे त्यांच्या अंत्यसंस्कारासाठी प्रवीण कोळी हा दुचाकीने सोयगाव येथील कंकराळा या गावी केलेला होता. तेथून कार्य आटोपून शुक्रवारी ६ डिसेंबर रोजी रात्री ११ वाजता तो दुचाकीने घरी परतत असताना शेंदुर्णी गावाजवळ त्याची दुचाकी अचानक घासरली.
या अपघातात प्रवीण गंभीर जखमी झाला. त्याला खाजगी वाहनाने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले. त्याच्यावर उपचार सुरू असताना शनिवारी ७ डिसेंबर रोजी रात्री १० वाजता त्याची प्राणज्योत मालविली. दरम्यान, या घटनेबाबत जिल्हापेठ पोलीस ठाण्यात अकस्मात मृत्यूची नोंद करण्यात आली. प्रवीण कोळीच्या निधनाने सार्वे गावामध्ये शोककळा पसरली आहे.
