मयत व्यक्ती जळगाव शहरातील माऊली नगराचे
भुसावळ (प्रतिनिधी) : भुसावळ शहरातील तापी नदीच्या पात्रात पश्चिमेकडील लहान पूलाच्या पुढे निमखाडी या भागात जळगाव येथील प्रौढाचा मृतदेह बुधवारी दुपारी १२ वाजेच्या सुमारास सापडला. बुधवारी तापी नदीच्या परिसरात गुरे चारण्यास गेलेल्या गुराख्याला तापीनदी पात्रात मृतदेह दिसल्यानंतर त्याने शहर पोलिसांना माहिती दिली.
संतोष बंडू सपके (४५, रा. माऊली नगर, जळगाव) असे मयत प्रवराचे नाव आहे. बुधवारी तापी नदीच्या पत्रात त्याचा मृतदेह आढळून आला होता. घटनास्थळी पोलिस उपनिरीक्षक विजय गायकवाड, सहायक फौजदार संजय पाटील, मेहूल शाह यांनी घटनास्थळी जात नागरिकांच्या सहकार्याने तापी नदीतून मृतदेह बाहेर काढून ग्रामीण रुग्णालयात हलवला. सोशल मिडीयात मयताचा फोटो टाकून ओळख पटविण्याचे आवाहन करण्यात आले.
याप्रकरणी सईद कालू गवळी (रा. जुना सतारा, मामाजी च्या टॉकीजजवळ, भुसावळ) यांनी खबर दिली. अधिक तपास हवालदार अनिल सुरवाडे करीत आहे.
