कोल्हापूर ( प्रतिनिधी ) – इचलकरंजी येथील स्टेशनरोडवरील हॉटेलसमोर शनिवारी मध्यरात्री तरुणाचा निर्घृण खून करण्यात आला. संतोष उर्फ पप्पू श्रीकांत जाधव असे त्याचे नाव आहे. घटनास्थळी हल्ल्यात वापरण्यात आलेली तलवार तुटून पडली होती. या हत्याकांडात कोयता आणि चाकुचाही वापर करण्यात आला
या घटनेनंतर संशयितांच्या घरावर दगडफेक आणि जाळपोळ केल्याने मोठा तणाव निर्माण झाला. रेकॉर्डवरील गुन्हेगार शुभम काणे याच्यासह सात जणांवर पोलिसांत गुन्हा नोंद केला आहे.
संतोष जाधव याच्या हॉटेलमधील एक कामगार व संशयित काणे यांच्यात वाद झाला होता. त्यात भाग घेतल्याने शनिवारी रात्री शुभम काणे, आदित्य सुतार यांच्यासह सात जणांनी तलवार, कोयता, चाकू अशी धारधार हत्यारे घेऊन दोन मोटारसायकलवर तीन-चार जण बसून स्टेशन रोडवरील हॉटेल जमजमजवळ थांबलेल्या जाधव यांच्यावर हल्ला केला. डोके, चेहरा, दोन्ही हात, छातीवर सपासप वार करण्यात आल्यांने तो गंभीर जखमी होऊन जागीच कोसळला. नंतर संशयितांनी तुटलेली तलवार घटनास्थळी टाकून पलायन केले. जखमी जाधव याला खाजगी रुग्णालयात उपचारासाठी दाखल केले. मात्र त्याचा मृत्यू झाल्याचं डॉक्टरांनी घोषित केलं.
ही माहिती समजताच परिसरात तणाव निर्माण झाला. तेथे जमावाने कांही संशयितांच्या घरावर हल्ला करायचा प्रयत्न केला. जाळपोळही करण्यात आली. संशयितांचा शोध घेण्यासाठी पोलिसांची विविध पथके रवाना झाली आहेत.
