अमळनेर शहरातील घटना
अमळनेर (प्रतिनिधी) : कुरियरने तलवार मागवणाऱ्या गांधलीपुरा भागातील पिता पुत्राला पोलिसांनी रंगेहाथ् पकडून अटक केली आहे. त्यांच्याविरुद्ध अमळनेर पोलीस स्टेशनला गुन्हा दाखल करण्यात आला आहे.
काही दिवसांपूर्वी शहरात मोठी घटना घडली होती. त्या पार्श्वभूमीवर आता अमळनेर पोलीस सतर्क झाले आहेत. त्यातच शहरात एकाने तलवार मागवल्याची माहिती पोलीस निरीक्षक विजय शिंदे यांना मिळाली. त्यांनी पोलीस उपनिरीक्षक अनिल भुसारे, हेडकॉन्स्टेबल शरद पाटील, रवींद्र पाटील, दीपक माळी, सिद्धांत शिसोदे याना दुपारी अर्बन बँकेच्या जवळ नाकाबंदी लावण्यास सांगितली.
दुपारी २ वाजेच्या सुमारास स्टेशन रोड कडून मोटरसायकल क्रमांक (एम एच १५ जी क्यू ५९०४)वर अदनान सादिक खाटीक (वय १९) रा.मिलन चिकन, लक्ष्मी टॉकीज मागे गांधलीपुरा हा पांढऱ्या गोणीत झाकून तलवार आणताना आढळून आला. त्याला विचारपूस केली असता अदनान याने वडील सादिक सुपडू खाटीक (वय ४७) यांच्या नावाने तलवार मागवल्याचे सांगितले.
पोलिसांनी दोघांना अटक करून शस्र कायद्यानुसार गुन्हा दाखल केला आहे.
पोलिसांनी अदनान याची मोटरसायकल आणि भ्रमणध्वनी असा एकूण १ लाख १२ हजार ९५० रुपयांचा मुद्देमाल जप्त केला आहे. तपास पोलीस उपनिरीक्षक अनिल भुसारे करीत आहेत.
