जळगावात तरुण डॉक्टरांचा हृदयविकाराने मृत्यू, सर्वत्र हळहळ
जळगाव (प्रतिनिधी) :- काही महिन्यांपूर्वी प्रमोशन झाले. तसेच, १० महिनेआधी विवाहदेखील झाला. आता घरात पाळणा हलणार होता. अशातच, क्रूर काळाने तरुण डॉक्टरांवर झडप घातली. बुधवारी १७ जानेवारी रोजी परिवारासह न्याहारी केल्यानंतर काही वेळाने बसल्या बसल्या हृदयविकाराचा झटका आला अन् त्यातच डॉक्टरांचा मृत्यू झाल्याची घटना घडली. यामुळे सर्वत्र हळहळ व्यक्त करण्यात येत असून तालुका पोलीस स्टेशनला अकस्मात मृत्यूची नोंद करण्यात आली आहे.
डॉ. मयूर मुरलीधर जाधव (वय ३६, रा. वास्तू नगर, वाघ नगर परिसर, जळगाव) असे मयत डॉक्टरांचे नाव आहे. ते चैतन्य आयुर्वेदिक महाविद्यालयात सहयोगी प्राध्यापक म्हणून कार्यरत होते. स्वस्थ वृत्त विभाग प्रमुख म्हणून जबाबदारी सांभाळत होते. आई, वडील, गरोदर पत्नी यांच्यासह ते राहत होते. काही दिवसांपूर्वी त्यांचा अपघात झाला होता. त्या अपघातातून सावरत ते बरे झाले होते. अपघातात हातापायाला मार लागला होता. मात्र प्रकृती ठीक होती. बुधवारी सकाळी उठल्यावर त्यांनी कुटुंबियांसह न्याहारी घेतली. त्यानंतर ते बसले असता अचानक घाम येऊन कोसळले. त्यांना शासकीय वैद्यकीय महाविद्यालय व रुग्णालयात आणले असता वैद्यकीय अधिकारी डॉ. निरंजन देशमुख यांनी त्यास मयत घोषित केले.
दरम्यान, त्यांच्या मृत्यूची माहिती मिळताच नातेवाईक, चैतन्य आयुर्वैदिक महाविद्यालयातील अधिकारी, प्राध्यापकांनी रुग्णालयात धाव घेतली होती. तरुण प्राध्यापक, चांगले सुखाचे दिवस सुरु असताना अचानक हृदयविकाराच्या झटक्याने डॉ. मयूर जाधव यांचा मृत्यू मनाला चटका लावून गेला आहे. याप्रकरणी तालुका पोलीस स्टेशनला अकस्मात मृत्यूची नोंद करण्यात आली आहे. प्राथमिक तपास पोहेकॉ लीलाधर महाजन करीत आहेत.
