गावात शोककळा ; मृत्यूचे कारण अस्पष्ट
जळगाव (प्रतिनिधी) : तालुक्यातील शिरसोली येथील १८ वर्षीय तरुणीने राहत्या घरात साडी बांधून गळफास घेतल्याने गावात खळबळ उडाली आहे. आत्महत्येचे कारण अजून कळले नसले तरी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
पूजा सुधाकर बारी (वय १८ रा. शिरसोली प्र.न. ता.जि.जळगाव) असे मयत तरुणीचे नाव आहे. ती घरात एकटीच होती. आज शनिवारी दुपारी २:३० वाजेच्या सुमारास आजी नबाबाई बारी ही कामावरून घरी आली असता या वेळेस तिला पुजा ही घरातील छताच्या कडीला साडी बांधून गळफास घेतल्या अवस्थेमध्ये आढळून आली. यावेळी आजीने हंबरडा फोडला. यावेळी आजूबाजूच्या नागरिकांनी धावं घेतली.
गावातील पोलीस पाटील श्रीकृष्ण बारी यांना कळवल्यानंतर त्यांनी एमआयडीसी पोलीस स्टेशनला कळवले. त्यानंतर पूजा हिला जळगाव शासकीय रुग्णालयात आणले असता या ठिकाणी वैद्यकीय अधिकारी यांनी तिला मृत घोषित केले. तीच्या पश्चात आई, भाऊ, आजी,असा परिवार आहे. तिने आत्महत्या का केली याबाबत माहिती मिळाली नाही. एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते.पुढील तपास पोलीस करीत आहे.
