यावल :- धार्मिक ट्रस्टकडून बेकायदेशीर बांधकाम केल्याप्रकरणी यावल पोलिसात मुख्याधिकार्यांच्या फिर्यादीनुसार गुन्हा दाखल करण्यात आला आहे. यावल पालिकेचे मुख्याधिकारी बबन तडवी यांच्या फिर्यादीनुसार मजहर अली इफ्तेखार खली (बाबुजीपुरा, यावल) व ख्वाजा मशीद मुस्लिम ट्रस्टचे अध्यक्ष शेख सैफुद्दीन शेख चांद यांनी शहरातील बाबुजीपुरा भागात सिटी सर्व्हे क्र. 3367 या जागेत बांधकामाच्या दिलेल्या परवानगीनुसार शर्ती व अटीचा भंग करुन पूर्वेकडील भिंत पाडून वापर पूर्वेकडे केला तसेच नगरपरीषदेची कोणतीही परवानगी न घेता व ना हरकत प्रमाणपत्र न घेता तेथे फ्रिज दुरुस्तीचे दुकान, जनरेटर व गॅस वेल्डिंगचे साहित्य वापरुन बेकायदेशीर कृत्य केले. एवढेच नव्हे तर सदर काम बंद करण्याची सूचना देवूनही ते थांबवले नाही म्हणून बुधवारी त्यांच्याविरुध्द महाराष्ट्र प्रादेशिक व नगर रचना कायदा 1966 चे कलम 52 (1) चे पोट कलम (अ),(ब) तसेच कलम 54 (2) प्रमाणे संबंधित दोघांविरुद्ध गुन्हा दाखल करण्यात आला आहे. अशा प्रकारे झाल्याने शहरात खळबळ उडाली आहे. पुढील तपास पोलिस निरीक्षक सुधीर पाटील यांच्या मार्गदर्शनाखाली हवालदार नितीन चव्हाण करीत आहेत.
