दोघं अटकेत, पोलीस बंदोबस्त तैनात
जळगाव (प्रतिनिधी) : जिल्हा परिषदेचे माजी सदस्य पवन भिलाभाऊ सोनवणे व मोहाडीचे सरपंच धनंजय सोनवणे या दोन्ही भावांच्या घरावर दगडफेक करुन घर व वाहनांच्या काचा फोडून दहशत माजविल्याप्रकरणी ९ जणांविरुध्द शनिवारी दि. ११ मे रोजी सकाळी एमआयडीसी पोलीस ठाण्यात दंगल तसेच जमावबंदी आदेशाचे उल्लंघन केल्याचा गुन्हा दाखल करण्यात आला आहे. दरम्यान, गावात तणावपूर्ण शांतता असून पोलीस बंदोबस्त तैनात करण्यात आला आहे.
मोहाडीचे सरपंच धनंजय भिलाभाऊ सोनवणे (वय ३३) यांनी फिर्याद दिली आहे. शुक्रवारी दि. १० मे रोजी सायंकाळी पाच वाजता गावातील काशिनाथ गवळी यांना जुन्या भांडणाच्या कारणावरुन दीपक हटकर, सागर हटकर, अंकुश हटकर हे मारहाण करीत असल्याचे समजले. सरपंच या नात्याने धनंजय सोनवणे हे गावात गेलो असता तिघं जण गवळी यांना मारहाण करीत होते. सागर संजय सोनवणे, शशीकांत लक्ष्मण सोनवणे व धनंजय सोनवणे अशांनी त्यांना समजावण्याचा प्रयत्न केला असता तिघांनांहि हटकर यांनी शिवीगाळ केली. थोड्या वेळाने सर्व जण तिथून निघून गेले.
मात्र शुक्रवारी संध्याकाळी साडे सात वाजता जळगाव शहरातील मोहाडी रोडवरील गुरु पेट्रोलपंपाच्या समोरील ईम्पेरीयल अपार्टमेंटच्याजवळ सागर संजय सोनवणे, शशीकांत लक्ष्मण सोनवणे असे बोलत असतांना तेथे राजु हटकर, अंकुश हटकर, गोलू हटकर, महेंद्र हटकर, सागर हटकर, दिपक हटकर, भरत हटकर, अर्जुन हटकर, आकाश हटकर हे हातात लाठ्याकाठ्या घेवून तेथे आले. अचानक मारहाण करायला लागले. यावेळी धनंजय सोनवणे हे बचावसाठी घरात गेले असता फ्लॅटवर दगडफेक करुन खिडकीच्या काचा फोडल्या.तसेच बाहेर कारच्या काचाही फोडल्या. पोलीस घटनास्थळी येताच सर्वांनी तेथून पळ काढला, असे फिर्यादीत नमूद आहे. अंकुश पुंडलिक हटकर (वय ३३) व आकाश बबन हटकर (वय २६) या दोघांना अटक करण्यात आली आहे. तर अन्य संशयितांचा शोध सुरु असल्याची माहिती पोलिसांनी दिली
