जळगाव शहरातील काव्यरत्नावली चौकात घटना
जळगाव (प्रतिनिधी) : सिगारेटचा माल देण्यासाठी निघालेल्या व्यक्तीला अज्ञात व्यक्तीने मारहाण करून लुटल्याची घटना २३ तारखेला दुपारी १.३० वाजता काव्यरत्नावली चौकात भाऊंच्या उद्यानाजवळ घडली. याप्रकरणी रामानंद नगर पोलिस ठाण्यात गुन्हा दाखल करण्यात आला आहे.
या घटनेत ५,५०० रुपयांची सिगारेट पाकिटे आणि खिशातील १,००० रुपये रोख रक्कम असा एकूण ६,५०० रुपयांचा ऐवज लुटण्यात आला. सुभाष रामराव घुगे (वय ३४, रा. अकोल, ह.मु. अयोध्या नगर) हे अकोला येथील रहिवासी असून सध्या अयोध्या नगरात वास्तव्यास आहेत. ते सिगारेट विक्रीचा व्यवसाय करतात. दि. २३ तारखेला दुपारी ते एमएच १९, डीजी ६६०५ या दुचाकीवरून सिगारेटचा माल देण्यासाठी निघाले होते. भाऊंच्या उद्यानाजवळ पोहोचल्यावर एका अज्ञात व्यक्तीने त्यांना हात दाखवून थांबवले. घुगे यांनी दुचाकी थांबवल्यावर त्या व्यक्तीने त्यांची कॉलर पकडून मारहाण करण्यास सुरुवात केली. तसेच, “तुझ्याकडील पैसे दे, नाहीतर तुला जिवे मारेन,” अशी धमकी दिली.
घुगे यांनी पैसे नसल्याचे सांगितल्यावर आरोपीने त्यांना कानशिलात मारून त्यांच्याकडील ५० सिगारेटची पाकिटे आणि खिशातील १,००० रुपये जबरदस्तीने काढून घेतले. घुगे यांनी आपला माल परत मागितल्यावर आरोपीने त्यांना पुन्हा मारहाण करून जखमी केले. मारहाणीत जखमी झालेल्या सुभाष घुगे यांनी तातडीने रामानंद नगर पोलिस ठाण्यात तक्रार दाखल केली. पोलिसांनी अज्ञात आरोपीविरुद्ध जबरी चोरीचा गुन्हा दाखल केला असून पोलिस उपनिरीक्षक प्रदीप बोरुडे या प्रकरणाचा तपास करत आहेत.
