माजी मंत्री एकनाथराव खडसे यांची माहिती
जळगाव (प्रतिनिधी) – भाजपा आणि शिंदे गटातील मतभेद आता चव्हाट्यावर आले आहेत. कल्याणमध्ये भारतीय जनता पार्टीच्या पदाधिकाऱ्यांची बैठक पार पडली होती. त्यांनी एकनाथ शिंदे यांचे चिरंजीव आणि कल्याण मतदारसंघाचे खासदार श्रीकांत शिंदे यांच्यावर मोठ्या प्रमाणावर आरोप केले. या आरोपांमुळे व्यथित होऊन मी राजीनामा देण्याच्या तयारीत आहे, असं श्रीकांत शिंदेंनी जाहीर केलं आहे,” अशी धक्कादायक माहिती राष्ट्रवादी काँग्रेस पक्षाचे विधानपरिषदेतील गटनेते एकनाथराव खडसे यांनी पत्रकारांना दिली आहे.
कल्याण लोकसभा मतदारसंघात भाजपा कायकर्ते सांगतील, तोच उमेदवार मान्य केला जाईल. अन्य कोणी उमेदवार सहन केला जाणार नाही, अशी भूमिका भाजपाच्या स्थानिक पदाधिकाऱ्यांनी घेतली आहे. विशेष म्हणजे मुख्यमंत्री एकनाथ शिंदे यांचे पुत्र श्रीकांत शिंदे हे कल्याण लोकसभा मतदारसंघाचे खासदार आहेत. असं असतानाही भाजपा कार्यकर्त्यांनी घेतलेल्या भूमिकेमुळे भाजपा व शिंदे गटातील वाद चव्हाट्यावर आला आहे. “जेव्हा एखाद्या खासदाराच्या राजीनाम्यापर्यंत विषय पोहोचतो, तेव्हा सर्व परिस्थिती व्यवस्थित आहे, असं काही नसतं. मुख्यमंत्र्यांच्याच घरापासून ही सुरुवात व्हायला लागली असेल, तर उभ्या महाराष्ट्रात काय चित्र असेल, याचा अंदाज आपण घेऊ शकतो,” असंही एकनाथ खडसे यांनी स्पष्ट केलं.
