जळगाव तालुक्यात वावडदा रस्त्यावर घडली घटना
जळगाव ( प्रतिनिधी ) – शिरसोलीकडून वावडदाकडे जाणाऱ्या रस्त्यावर नेवरा मारुती मंदिराजवळ झालेल्या एका भीषण अपघातात ३७ वर्षीय दुचाकीस्वाराचा जागीच मृत्यू झाला. समोरून येणाऱ्या भरधाव महिंद्रा वाहनाने धडक दिल्याने हा अपघात झाला. या प्रकरणी एम.आय.डी.सी. पोलीस ठाण्यात गुन्हा दाखल करण्यात आला आहे.
जगदीश अशोक पाटील (वय ३७, रा. शिरसोली प्र.बो.) हे १४ फेब्रुवारी रोजी रात्री ११:३० च्या सुमारास आपल्या हिरो स्प्लेंडर मोटारसायकलने (क्रमांक एमएच १९ बिडी ११६५) शिरसोलीकडून वावडदाकडे जात होते. यावेळी समोरून येणाऱ्या एका भरधाव महिंद्रा कंपनीच्या वाहनाने (क्रमांक एमएच २० ईजी ६५२९) त्यांना जोरदार धडक दिली. धडक इतकी भीषण होती की जगदीश पाटील यांच्या डोक्याला आणि पायाला गंभीर दुखापत झाली.
अपघात झाल्यानंतर संबंधित वाहनचालक मदतीसाठी न थांबता घटनास्थळावरून फरार झाला. मात्र, गावकऱ्यांनी पाठलाग करून नायरा पेट्रोल पंपाजवळ वाहन अडवले. अपघाताची माहिती मिळताच नातेवाईक अनिल वसंत पवार आणि इतर ग्रामस्थांनी घटनास्थळी धाव घेतली. जगदीश यांना तातडीने रुग्णवाहिकेने जळगाव येथील सिव्हिल हॉस्पिटलमध्ये दाखल करण्यात आले.
मात्र, डॉक्टरांनी त्यांना तपासून मृत घोषित केले. या प्रकरणी अनिल पवार यांनी दिलेल्या तक्रारीवरून एम.आय.डी.सी. पोलीस स्टेशनमध्ये महिंद्रा वाहन चालकाविरुद्ध गुन्हा नोंदवण्यात आला आहे. पोलीस या प्रकरणाचा अधिक तपास करत असून फरार चालकावर कारवाई करण्याची प्रक्रिया सुरू आहे.
