जळगाव तालुक्यात शिरसोली येथील घटना
जळगाव (प्रतिनिधी) : तालुक्यातील शिरसोली प्र. न. येथे एका विवाहितेने माहेरी आली असताना व ५ महिन्यांची गरोदर असताना तिने छताला गळफास लावून घेत आत्महत्या केली. हि घटना गुरुवारी दि. १८ सप्टेंबर रोजी दुपारी ४ वाजेच्या सुमारास उघडकीस आली. या घटनेमुळे शिरसोली येथे खळबळ उडाली असून एमआयडीसी पोलीस स्टेशनला अकस्मात मृत्यूची नोंद करण्यात आली आहे.
प्रतीक्षा चेतन शेळके (वय २२, रा. शिरसोली प्र. न. ता. जळगाव) असे मयत विवाहितेचे नाव आहे. तिचे वर्षभरापूर्वी पुणे येथील चेतन शेळके याच्याशी लग्न झाले होते. विवाहसंबंधातून प्रतीक्षा ५ महिन्यांची गरोदर होती.दरम्यान, गरोदर असल्याने प्रतीक्षा शिरसोली येथे माहेरी वडिलांच्या घरी भागवत धामणे यांचेकडे आली होती.(केसीएन)माहेरी आई, वडील, लहान भाऊ, आजी असा परिवार आहे.दरम्यान, गुरुवारी दुपारी प्रतीक्षा हि घरी एकटीच होती. तेव्हा तिने छताला गळफास लावून घेत आत्महत्या केली. तिची आजी दुपारी घरी आली तेव्हा तिला प्रतीक्षाचा मृतदेह दिसला. यावेळी तिने एकच हंबरडा फोडला.
आजीचा आवाज ऐकून शेजारील ग्रामस्थ धावत आले. त्यांनी प्रतिक्षाच्या कुटुंबाला माहिती दिली. पोलीस पाटील श्रीकृष्ण बारी यांनी घटनास्थळी येऊन एमआयडीसी पोलीस स्टेशनला माहिती दिली.(केसीएन)प्रतीक्षाचा मृतदेह शासकीय वैद्यकीय महाविद्यालय व रुग्णालय येथे दाखल केला असता तेथे तपासून तिला मयत घोषित करण्यात आले. यावेळी कुटुंबीयांनी रुग्णालयात एकच आक्रोश केला. दरम्यान, प्रतिक्षाने आत्महत्या का केली याबाबत कारण अस्पष्ट आहे. घटनेप्रकरणी शिरसोली येथे शोककळा पसरली असून एमआयडीसी पोलीस स्टेशनला अकस्मात मृत्यूची नोंद करण्यात आली आहे.
