जामनेर तालुक्यातील पहूर येथील घटना
जामनेर (प्रतिनिधी) : तालुक्यातील पहूर पेठ गावातील रहिवासी व प्राथमिक आरोग्य केंद्रातील शिपाई प्रौढाने राहत्या घरात गळफास लावून आत्महत्या केल्याची घटना बुधवारी दि. ८ रोजी दुपारच्या सुमारास घडली आहे. याप्रकरणी पहूर पोलिसात अकस्मात मृत्यूची नोंद करण्यात आली आहे.
कैलास भागवत देशमुख (५४) असे मयत व्यक्तीचे नाव आहे. कैलास भागवत देशमुख हे लोहारा प्राथमिक आरोग्य केंद्रात शिपाई पदावर कार्यरत होते. त्यांच्या पश्चात पत्नी, मुलगा आणि मुलगी असा परिवार आहे. बुधवारी घरात कोणी नसताना त्यांनी घरात स्वतःला गळफास लावून आत्महत्या केली. त्यांचा मुलगा अभिषेक घरी आल्यावर घटना उघडकीस आली. पहूर ग्रामीण रुग्णालयात दाखल केल्यानंतर वैद्यकीय अधिकारी डॉ. बिलाल शेख यांनी तपासणी करून त्यांना मृत घोषित केले. पहूर पोलिसांनी अकस्मात मृत्यूची नोंद केली आहे. आत्महत्येचे कारण अस्पष्ट असून गावात शोककळा पसरली आहे.
