चाळीसगाव शहरातील घटना
जळगाव (प्रतिनिधी) :- एटीएमच्या कॅबीनमध्ये एटीएम कार्डाची अदलाबदली करत एका भामट्याने शेतकऱ्याच्या खात्यातून ४० हजार रुपये काढून घेतले. शुक्रवार दिनांक ११ रोजी सकाळी ११.३० वाजेच्या सुमारास ही घटना चाळीसगाव येथे एसबीआय एटीएममध्ये घडली. याप्रमाणे चाळीसगाव शहर पोलीस स्टेशनला गुन्हा दाखल करण्यात आला आहे.
चाळीसगाव तालुक्यातील ६२ वर्षीय शेतकरी खात्यातून पैसे काढण्यासाठी चाळीसगाव येथे भडगाव रोडवरील एसबीआयच्या एटीएम मशीन कॅबीनमध्ये आले. याठिकाणी ३५ ते ४० वर्षीय अनोळखी व्यक्तीने शेतकऱ्याकडील एटीएम कार्डाचा पीन नंबर पाहिला. त्यानंतर कार्ड हात चलाखीने अदलीबदल करुन घेतले. शेतकऱ्याच्या खात्यातून ४० हजार रुपये काढुन घेत भामटा पसार झाला.
हा प्रकार लक्षात आल्यानंतर शेतकऱ्याने तक्रार दिली. त्यानुसार सोमवार दिनांक १४ रोजी चाळीसगाव शहर पोलीस ठाण्यात गुन्हा दाखल करण्यात आला. तपास पोउपनि अरुण बाविस्कर हे करीत आहेत.
