विविध परिसंवादासह कवी संमेलन, पुरस्कार वितरण
जळगाव (प्रतिनिधी) :- पवन चारिटेबल ट्रस्ट, अर्पण सेवा ट्रस्ट, कविवर्य स्वर्गीय पुरुषोत्तम नारखेडे बहुउद्देशीय संस्था, युवा विकास फाउंडेशन यांच्या सौजन्याने कविवर्य स्वर्गीय पुरुषोत्तम नारखेडे (मालतीकांत) यांच्या स्मृती प्रित्यर्थ १८ वे बहिणाबाई सोपानदेव खान्देश खान्देस्तरीय मराठी साहित्य संमेलनाचे आयोजन करण्यात आले आहे. हे संमेलन १३ जुलै, रविवार रोजी सकाळी ९ ते सायंकाळी ६ वाजेपर्यंत सरदार वल्लभभाई पटेल लेवा भवन हॉल, जळगाव येथे होणार आहे.
संमेलनाचे उद्घाटन आ. राजूमामा भोळे यांच्या हस्ते होणार आहे. संमेलन अध्यक्षस्थानी डॉ. फुला बागुल असून प्रमुख पाहुणे म्हणून खा. स्मिताताई वाघ, शिवसेनेचे जिल्हाध्यक्ष विष्णू भंगाळे, माजी नगरसेवक अमित काळे, माजी संमेलनाध्यक्ष संजिवकुमार सोनवणे उपस्थित राहणार आहेत. स्वागताध्यक्ष म्हणून पुष्पाताई साळवे, कार्याध्यक्ष विजय लुल्हे तसेच प्रमुख अतिथी निवृत्त डी. वाय. एस.पी. राजेंद्र रायसिंग, ज्येष्ठ पत्रकार किरण अग्रवाल, निवृत्त प्राचार्य आप्पासाहेब निळकंठ गायकवाड, लेवा संघ महाराष्ट्र राज्याचे अध्यक्ष प्रवीण भोळे, बहिणाबाई स्मारक समितीचे अध्यक्ष किशोर चौधरी आदी मान्यवर उपस्थित राहणार आहेत.
याप्रसंगी बहिणाबाई सोपानदेव चौधरी मालतीकांत जीवनगौरव पुरस्कार २०२५ ज्येष्ठ साहित्यिक डॉ. अरविंद नारखेडे यांना प्रदान करण्यात येईल. संमेलनात पोस्टर पोएट्री व खानदेशातील कवी-कवयित्रीं च्या स्वलिखित कवितांचे प्रदर्शन आयोजित केले आहे. प्रदर्शनाचे उद्घाटन सुप्रसिद्ध चित्रकार राजू बाविस्कर करतील.
समारोप सत्राच्या अध्यक्षस्थानी पौर्णिमा ताई हुंडीवाले असून त्यांच्या हस्ते पुरस्कार वितरण व कवींच्या सहभागाचे सन्मानपत्र प्रदान करण्यात येणार आहे. खान्देशातील साहित्यिकांनी साहित्य संमेलनात आवर्जून बहुसंख्येने उपस्थित राहून लाभ घ्यावा असे विनम्र आवाहन निमंत्रक डॉ. विलास नारखेडे व लिलाधर नारखेडे, कार्याध्यक्ष विजय लुल्हे, आयोजक रघुनाथ राणे, डॉ. संजय पाटील, प्रा. संध्या महाजन व ज्योती राणे तसेच संस्थेच्या पदाधिकाऱ्यांनी केले आहे.
