एरंडोल तालुक्यातील पिंपळकोठा येथील हृदयद्रावक घटना
एरंडोल (प्रतिनिधी) :- विद्यार्थ्याची वाहतूक करणाऱ्या वाहनाचे चाक अंगावर गेल्याने चार वर्षीय बालक जागीच ठार झाल्याची हृदयद्रावक घटना शुक्रवारी दुपारी २ वाजता पिंपळकोठा खुर्द, ता. एरंडोल येथे घडली. याप्रकरणी एरंडोल पोलीस स्टेशनला गुन्हा दाखल करण्यात आला आहे.
पिंपळकोठा खुर्द येथील माजी सरपंच नारायण मासाळ यांचे नात आरुष (वय ६ वर्षे) व शुभम (वय ४) हे दोघे पाळधी येथील जीपीएस शाळेत शिक्षण घेत आहेत. त्यांना शाळेत जाण्यासाठी (क्र. एम.एच. १९ इ.ए. ६८५६) हे वाहन लावले होते. शुक्रवारी सकाळी आरुष व शुभम हे या वाहनातून शाळेत गेले. शाळा सुटल्यानंतर ते दोन्ही वाहनातून खाली उतरल्यानंतर गाडी वेगाने पुढे निघाली. शुभम यास वाहनाचा धक्का लागला आणि तो खाली पडला. त्याचवेळी त्याच्या अंगावरून वाहनाचे चाक गेले.
रात्री उशिरा शुभमचा मृतदेह नातेवाईकांच्या ताब्यात देण्यात आला. शुभमचे आईवडील व कुटुंबीयांनी एकच हंबरडा फोडला. कुटुंबीयांचा विशेषतः शुभमच्या मातेचा आक्रोश पाहून उपस्थितांना अश्रू अनावर झाले. या प्रकरणी वाहनचालक मनोज मुक्तारसिंग पाटील याच्याविरुद्ध एरंडोल पोलीस स्टेशनला गुन्हा दाखल करण्यात आला आहे.
