जळगाव परिमंडलात महावितरणच्या योजनांना प्रतिसाद
जळगाव (प्रतिनिधी) :- ग्राहक सुविधांसाठी महावितरणकडून सातत्याने नवतंत्रज्ञानाचा वापर केला जातो. ग्राहकांचा वेळ आणि श्रम वाचावेत यासाठी ऑनलाईन वीजबिल भरणा प्रक्रियेला गती देण्यात येते. महावितरणच्या या ऑनलाईन पध्दतीला जळगाव परिमंडलातूनही उत्तम प्रतिसाद मिळत आहे. नोव्हेंबर २०२४ या महिण्यात जळगाव, धुळे आणि नंदुरबार जिल्ह्यांचा समावेश असणाऱ्या जळगाव परिमंडलातून उच्चदाब व लघुदाब वर्गवारीतील ५ लाख २० हजार ४५९ वीज ग्राहकांनी २१० कोटी ७३ लाख रुपयांचा भरणा केला आहे.
ऑनलाईन विजबिल भरणा पध्दतीमुळे ग्राहकांना रांगेत उभे राहून अधिकचा वेळ खर्ची घालवण्याची गरज नाही. ऑनलाईन वीजबिल भरणा केल्यामुळे ग्राहकांचा वेळ वाचणार आहे. शिवाय, वीज यंत्रणेवरील वसुलीसाठीचा अतिरिक्त ताणही कमी होणार आहे. ग्राहकांना वीज सेवेबाबतचे एसएमएस देण्यासाठी ग्राहकांच्या मोबाईल क्रमांकाची नोंदणीही सुरु असून ग्रामीण भागातल्या वीज ग्राहकांची भाषेची सोय व्हावी म्हणून महावितरणतर्फ़े आता इंग्रजीसह मराठी भाषेतूनही एस एम एस सेवा सुरु आहे. जळगांव जिल्ह्यातून नोव्हेंबर महिन्यात ३ लाख ४५ हजार ग्राहकांनी १२७. ५६ कोटी रुपयांचा ऑनलाईन विजबिल भरणा केला.
धुळे जिल्ह्यातून १ लाख १९ हजार ३८३ ग्राहकांनी ६५. १३ कोटी तर नंदूरबार जिल्ह्यातून ५५ हजार ८७७ ग्राहकांनी १८ कोटी ४ लाख रुपयांचा ऑनलाईन भरणा केला. आपल्याकडे संगणकावर किंवा महावितरण मोबाईल ॲप व महापॉवरपेच्या मदतीने वीजबिल भरण्याची सोपी पध्दत उपलब्ध आहे. ग्राहकांचा वेळ आणि श्रम वाचावेत, रांगेत तिष्ठत उभे राहाण्याची गरज भासू नये म्हणून महावितरणच्या www.mahadiscom.in या संकेत स्थळावर जाऊन ग्राहकांना चालू वीजबिल भरण्याची सुविधा आहे. ऑनलाईन बिल भरल्यास संगणकीकृत पावती ग्राहकाला मिळते. महावितरणचे मोबाईल ऑनलाईन ॲप्लीकेशन मराठी आणि इंग्रजी भाषेत उपलब्ध असून ती सेवा चोवीस तास उपलब्ध आहे. त्यामुळे ग्राहकाला आपले वीजबिल केव्हाही आणि कुठूनही भरता येते.
एस एम एस सेवेसाठी वीज ग्राहकांनी महावितरणकडे आपल्या मोबाईल क्रमांकाची नोंदणी करणे आवश्यक आहे. नोंदणीसाठी ग्राहकांनी मराठी, मराठी भाषेसाठी टाईप करुन स्पेस देऊन आपला बारा अंकी वीजग्राहक क्रमांक टकून 9225592255 या क्रमांकावर एस.एस.एस. करावा लागणार आहे. महावितरणच्या ग्राहकांना विविध सेवांची माहिती तसेच त्यांच्या तक्रारीचे निवारण करण्यासाठी आठवड्यातील सातही दिवस व चोवीस तास टोल फ़्री सेवा उपलब्ध करुन दिली आहे. 1912 व 1800233435, 18001023432 या क्रमांकावर तक्रार नोंदविता येते. अधिकाधिक ग्राहकांनी महावितरणच्या ऑनलाईन सुविधांचा लाभ घ्यावा. असे आवाहन मुख्य अभियंता आय. ए. मुलाणी यांनी केले आहे.
