मला वाचवा, कोठेतरी लपवा… माझे भाऊ, आई-वडील मला मारून टाकतील…
जामनेर तालुक्यातील तोंडापूर येथील फिल्मी थरार, फर्दापूर हद्दीत घडली घटना
जळगाव (प्रतिनिधी) – जामनेर तालुक्यातील तोंडापूर परिसराला लागून असलेल्या सोयगाव तालुक्यातील राक्षा शिवारात “सैराट” सिनेमाची पुनरावृत्ती घडली असून संतापजनक घटना समोर आली आहे. आंतरजातीय प्रेमसंबंधाच्या कारणावरून दोन भावांनी आई-वडील यांच्या चिथावणीवरून बहिणीची हत्या केली आहे. मला वाचवा, कोठेतरी लपवा… माझे भाऊ, आई-वडील मला मारून टाकतील… असे ओरडत ती महिला राक्षा शिवारात आली असताना फिर्यादीने तिला वाचविण्याचा प्रयत्न केला. मात्र संशयितांनी दांडगाई करीत फिर्यादीला मारहाण केली. नंतर स्वतःच्या बहिणीची कुऱ्हाडीने वार करून निर्घृण हत्या केली. याप्रकरणी फर्दापूर पोलीस ठाण्यात एकूण ४ जणांच्या विरोधात गुन्हा दाखल करण्यात आला आहे. सर्व संशयितांना अटक करण्यात आली आहे, अशी माहिती एपीआय भारत मोरे यांनी “केसरीराज”शी बोलताना दिली.
शमीम शहा कासम शहा, (वय ३० वर्षे, व्यवसाय मजुरी, रा. तोंडापुर, ता. जामनेर) यांनी फिर्याद दिली आहे. ते गावात मजुरी करून परिवाराचा उदरनिर्वाह करतात. त्यांच्या शेताचे वरच्या बाजुला असलेल्या शेतामध्ये गावातीलच धोंडीबा सांडु बावस्कर यांची शेतजमीन व घर आहे. धोंडीबा हे त्यांचे परिवारासह त्यांची पत्नी शेवंताबाई, दोन मुले शिवाजी व कृष्णा तसेच मुलगी चंद्रकला असे राहतात. त्यांची मुलगी चंद्रकला ही मागील पाच वर्षापासुन तीचे व तीचे सासरचे लोकांचे पटत नसल्याने सासरी न राहता माहेरी मौजे राक्षा शिवारातील त्यांचे शेतवस्तीवरच राहत होती. फिर्यादीचा भाऊ रहीम शहा व चंद्रकला यांचे खुप वर्षापासुन प्रेमसंबंध होते. सदर संबंध चंद्रकलाचे घरच्यांना मान्य नव्हते. सुमारे एक महीन्यापूर्वी रहीम व चंद्रकला असे दोघेजण लग्न करण्यासाठी तोंडापूर येथून सुरत येथे पळुन गेले होते. परंतु सर्वांनी त्यांची दोघांचीही समजुत घालून सदर मुलगी चंद्रकला हीला तीचे आई-वडीलांचे ताब्यात पहुर पोलीस ठाणे येथे दिले होते. तेव्हापासुन चंद्रकलाबाई हीला तीचे आई-वडील व भाऊ हे रहीमसोबत असलेल्या प्रेमसंबंधामुळे नेहमीच मारहाण करुन तीला जीवंत ठेवायचे नाही असे भांडणे करत होते.
शनिवारी १६ सप्टेंबर रोजी सकाळी फिर्यादी शमीम शाह हे नेहमीप्रमाणे शेडवर काम करत असतांना सकाळी ९ वाजेच्या सुमारास धोंडीबा बावस्कर यांची मुलगी चंद्रकलाबाई ही पळतच फिर्यादीच्या शेडवर आली व म्हणाली की, माझे भाऊ, आई-वडील हे मला मारुन टाकणार आहेत. मला वाचवा. मला तुम्ही कोठेतरी लपवा असे बोलत होती. तेव्हा फिर्यादीने तिला बकऱ्यांचे शेडमध्ये लपण्यासाठी सांगीतले. ती शेडमध्ये बकऱ्यांमध्येच लपली होती. तेवढयात तेथे मयत चंद्रकला हिचे भाऊ कृष्णा व शिवाजी बावस्कर असे दोघेजण पळतच आले. फिर्यादीला पकडुन चापट-बुक्क्यांनी मारहाण केली. त्यांचे दोघांचे हातामध्ये कुऱ्हाडी होत्या. तेव्हा शिवाजी व कृष्णा असे दोघांनी चंद्रकलाबाई लपलेल्या शेडमध्ये जावुनपाहिले. तेव्हा कृष्णा याने चंद्रकलाबाई हीला बकऱ्यांमधुन ओढले व त्याचे हातातील कुऱ्हाडीने चंद्रकला हीच्या डोक्यात मारुन तीला जीवे ठार मारले.
दुसरा भाऊ शिवाजी यानेदेखील त्याचे हातातील कुऱ्हाडीचे पाते चंद्रकला हीचे डोक्यात मारले. तेव्हा चंद्रकला हीचे आई-वडील तिथे आले व त्यांनी परत फिर्यादीला चापट बुक्क्यांनी मारहाण केली. ते शिवाजी व कृष्णा यांना चंद्रकला हीला मारुन टाका. जीवंत ठेवु नका असे सांगत होते. तेव्हा फिर्यादीने धोंडीबा बावस्कर यांच्या हाताला झटका मारुन तेथुन पळुन गावाकडे पळत येत आला. त्यानंतर भाऊ, वडिलांसह फिर्यादीने पहूर पोलीस ठाणे गाठले. नंतर, सदरची घटना ही पोलीस ठाणे फर्दापूर हद्दीतील असल्याने फिर्यादी शमीम शाह याने तेथे फिर्याद दाखल केली. त्यानुसार खुनाचा गुन्हा दाखल झाला आहे. माहिती मिळताच फर्दापूर पोलिस ठाण्याचे सहायक पोलिस निरीक्षक भरत मोरे पथकासह घटनास्थळी दाखल झाले. पंचनामा करून मृतदेह शवविच्छेदनासाठी सोयगाव ग्रामीण रुग्णालयात हलवण्यात आला. संशयित सर्व आरोपी मयत चंद्रकला हिचे भाऊ कृष्णा धोंडीबा बावस्कर, शिवाजी धोंडीबा बावस्कर, वडील धोंडीबा सांडु बावस्कर, आई शेवंताबाई धोंडीबा बावस्कर यांना अटक करण्यात आली आहे, अशी माहिती एपीआय भारत मोरे यांनी “केसरीराज”शी बोलताना दिली. तपास एपीआय भरत मोरे करीत आहे.
