बेदम मारहाणीत मृत्यू झालेल्या अनोळखीची पटली ओळख
जळगाव (प्रतिनिधी ) – एका तीन वर्षीय बालकाचे अपहरण केल्याच्या निव्वळ संशयावरून जमावाने केलेल्या बेदम मारहाणीत मृत्यू पावलेल्या अनोळखी व्यक्तीची अखेर ओळख पटली आहे. बिनोद जोरेम सोरेन (वय ४४, रा. कुलूशेरा, जि. गुमला, झारखंड) असे मृताचे नाव असून, गोव्याला कामाच्या शोधात जात असताना जळगावला उतरणे त्यांच्या जीवावर बेतले.
मयत बिनोद हे झारखंड येथून आपल्या एका मित्रासोबत रेल्वेने कामासाठी गोव्याला जाण्यास निघाले होते. मात्र, २४ फेब्रुवारी रोजी प्रवासादरम्यान ते अचानक जळगाव स्थानकावर उतरले. त्यांच्या मित्राने त्यांना सोबत चालण्याविषयी वारंवार समजावले, परंतु त्यांनी ऐकले नाही. त्यानंतर ते चालत-चालत आव्हाणे शिवारातील लक्ष्मी जिनिंगजवळ पोहोचले. तिथे एका लहान मुलाला पळवून नेत असल्याच्या संशयावरून जमावाने त्यांना बेदम मारहाण केली, ज्यात त्यांचा मृत्यू झाला. याप्रकरणी पोलिसांनी गुन्हा दाखल करून संशयितांना अटक केली आहे.
मृताची ओळख पटवणे हे पोलिसांसमोर मोठे आव्हान होते. ओळख पटवण्यासाठी तालुका पोलिसांनी मृताची AI (कृत्रिम बुद्धिमत्ता) इमेज तयार करून सोशल मीडियावर प्रसारित केली. तीन दिवसांनंतरही ओळख न पटल्याने पोलीस अंत्यविधीची तयारी करत होते. मात्र, शेवटचा प्रयत्न म्हणून पोलीस निरीक्षक शशिकांत पाटील व तपासाधिकारी अनंत अहिर यांनी लोहमार्ग पोलीस ठाण्यात चौकशी करण्याचा निर्णय घेतला.
लोहमार्ग पोलीस ठाण्यात पोलिसांना मृताशी मिळताजुळता एक फोटो दिसला. त्यावरील क्रमांकावर संपर्क साधला असता, तो क्रमांक बिनोद यांच्या मित्राचा निघाला. योगायोगाने हा मित्रही जळगाव स्थानकाच्या परिसरातच आपल्या मित्राचा शोध घेत होता. त्याला रुग्णालयात नेऊन मृतदेह दाखवला असता त्याने बिनोदला ओळखले. त्यानंतर कुटुंबाशी संपर्क साधण्यात आला आणि जळगावात पोहोचलेल्या बहिणीने आपल्या भावाच्या मृतदेहाची अधिकृत ओळख पटवली.
